n Ramdane Lasheb
D aggur n yebrir yezrin, i yellan d azamul i umennuγ γef tmaziγt , i yextar Mass LASHEB ramdane i wakken ad d-yessewjed yiwen udlis-nniḍen iwumi yefka isem ‘’Autour de la civilisation amazighe’’. Adlis-a yeffeγ-d γer tezrigin ‘’L’Odyssée’’.
Adlis, yezzi-d s umata i tγerma tamaziγt. Yesseqdec deg-s tarrayt tusnant i yesmaggaren aṭas n yiḥricen n tussna. Yal amagrad d agerruj n yisallen γef umezruy n Yimaziγen. Ramdane LASHEB i yettwesnen d amnadi deg uḥric-agi n (l’archéologie), d aselmad, di&gamma,; n tutlayt tamaziγt. Am wakken yesεa agerdas n Master deg les sciences de l’éducation, tasdawit n Paris 8. Deg udlis-a, ad naf azal n tesεa (9) n yimagraden i d-yefren gar wayen yura yakan deg umecwar n unadi ines. Tazwart tella-d s-γur Dr. Dida BADI Ag Khammadine, yiwen i mechuren aṭas deg tama-agi n Yimucaγ. Amagrad amezwaru yettmeslay-d γef laṣel n Yimaziγen. Da, Mass LASHEB, yessenṭeq-d timuγliwin n yimusnawen n umezruy d waṭas n yiḥricen : ama d tid uγur ṣṣawḍen zik neγ d tid n tura : yeεreḍ ad d-yerr γef usteqsi-a :’’Ahat, Imaziγen ur d-usin ara seg wanda-nniḍen ?’’ Asentel-nniḍen yewwi-d γef tira. Ula da, yefka-d yiwet n tmuγli s telqayt γef tira ‘’Tifinaγ’’ d wanda i d-tekka. Syin, yuγal γer temsal n tmetti anda i d-yura γef kra n talliyin n ddin; ama d tamasiḥit neγ d tineslemt. Din, dγa, i d-yewwi awal γef yimrabḍen d wamek i d-wwḍen γer tmurt n Leqbayel. Ikemmel deg uḥric-agi n tmetti s temsalt n tsertit akked tdamsa mebla ma yettu tamsalt i d-icudden γer tmettant d unṭal n umdan deg leεwayed n Yimaziγen. Ula d aẓar n wawalen uddisen n tmurt n Leqbayel s umagrad-is. Akka i yefreq Mass LASHEB awalen-agi uddisen d iḥricen u εlaḥsab n yinumak nsen. Amagrad wis 7, yeεna tamedyazt n tlawin deg lgira (1954-1952). Tigemmi tadelsant tamaziγt d useḥbiber fell-as teṭṭef amḍiq s wazal-is deg udlis-agi imi leqdic akk n umnadi-agi icudd γer waya. Γef wanect-a, dγa, i d-yefka kra n yiwellihen i yeεnan asiḥbiber γef tgemmi akked wamek ara d-tili ttrebga deg uḥric-agi. Adlis, yekfa-t s uzbu (résistance) n Wat Dwala deg umezruy.
Hocine.M