Mazal-aɣ deg waggur n tefsut, mazal-aɣ deg waggur n tgemmi ! Ma yella win i ilaqen ad t-id-nebder ass-a deg unnar n useḥbiber ɣef yidles d tutlayt-nneɣ, mebla ccekk, d win akken iɣef d-yers ṭṭlam deg wass azal n 11 n yiseggasen. Wagi d Muḥend U Harun, mmi-s n ssarǧan Tahar, yeɣlin deg unnar n ṭṭrad mgal Arumi deg useggas n 1958. Amennuɣ yebda-d si tjaddit : ababat yennuɣ amnekcam deg udrar, s lfuci. Tayemmat, tessawaḍ isallen, tettnawal aɣrum. Axalaf, yugi lbaṭel, yuɣ abrid n umennuɣ, yettwaḥbes di tmurt i d-iḥella baba-s ! Akka i d zher n unazbay !
Aniwa ur nesli ara s tedyant n 1976 d terbaɛt n wid iwumi qqaren :« les poseurs de bombes » ? Muḥend U Harun, Smaɛil Meǧber, Ahsen Cirifi, Baḥbuḥ Leḥsen, Ḥusin Cerradi d wiyaḍ sxerben urar i yimḍebren n tallit-nni, wid yenwan dakken rran tablaḍt i tmaziɣt d wayen akken i tezzuɣur d idles, d insayen akked ṣwab. Zdat leqyud yuɣalen i tlelli n wawal, snasel yurzen aḍar ara inadin ɣef uẓar, mmi-s n Tefrit yesseɣres-iten, yefren « ad negrent tudrin, wala ad yenger laṣel ». Yebda akka netta d terbaɛt-is s usufeɣ n yiwet n tesɣunt iwumi i isemma : iṭij, tayeḍ taftilt. Mi yella yakan deg tesnawit n Dellys, ifures tagnit iwakken ad yeldi allen i yinelmaden ɣef lḥers i tettidir tutlayt-nsen. D ayen i yeǧǧan iselmaden n tallit-nni (yerna mačči d izzayriyen) ad ccetkin fell-as ! Inelmaden i yellan ttafraqen tasɣunt-nni ttwaṭṭfen, ɛeddan di lḥers meqqren, ayen yeǧǧan imir imsulta gren-d Muḥend gar wallen-nsen, ttɛassan akk ayen i ixeddem. Ass n 5 di yennayer 1976, yettwaḥbes daxel n usečču n tesdawit mi yella itett imensi, acku teṭṭerḍeq yiwet n lbumba deg uxxam n uɣmis El Moudjahid, tayeḍ deg lkazirna n Qsenṭina. Aya akk sbabben-t i Muḥend U Harun iɛeddan deg yiwen n lḥers n useqsi d leɛtab. Iɛedda di creɛ, yettwaḥkem fell-as lḥebs i lebda, dɣa ssawḍen-t ɣer Lambiz, rran-d weḥdes di texxamt azal n 11 n yiseggasen. Ɣas akken d lḥif, meɛna d tallit i ifures iwakken ad yexdem anadi ɣef tmaziɣt, asuqel n Leqran ɣer tmaziɣt, almad n tutlayin nniḍen…
Dɣa, asmi akken i d-yeffeɣ seg unekruf ass n 5 di meɣres 1987, yerza ɣer waṭas n temnaḍin, ladɣa mbeɛd timesbaniyin n tuber 1988. Cfiɣ akka, deg unnar n M’chedallah, yeɣra-d akka yiwet seg tṣurtin n ddin s tmaziɣt. Yessewhem medden !
D tagnit i ifures unazbay-agi iwakken ad d-yerr tiririt i wid i s-yeqqaren d arebrab, imi isers lbumbat. Ibeggen-d belli « ce n’est pas un poseur de bombes, mais un poseur de dignité »
Ɣas akken yufa-d axxam d ilem, yemma-s temmut deg yiwet n twaɣit n ubrid mi truḥ ad terzu ɣur-s ɣer lḥebs, meɛna arraw n taddart-is d yimaziɣen irkelli gren-as irebbi iwakken ur yettɣimi ara d awḥid. Meɛna, 11 n yiseggasen n lḥebs ǧǧan-d deg-s ccama ur nmeḥḥu, imi aṭṭan i t-ikecmen yegguma ad as-yebru. Ass n 22 di maggu 1996, yewweḍ leɛfu n Rebbi, yeǧǧa-d deffir-s tameṭṭut d tilemẓit d snat n teqcicin. Ulamma ur yeḥḍir ara i unerni n tmaziɣt iɣef yefka tudert-is, ass-a ad as-nerr tajmilt imi s umennuɣ-is i nessaweḍ meqqar ɣer kra n yisebtar-a i d-yettefɣen tikkelt deg yimalas, i yinelmaden i tt-yeqqaren deg yiɣebazen, i tesdawiyin yeldin tibbura-nsent i yigezda n tmaziɣt…u mazal lxir ɣer zdat
Tṭes di talwit a Muḥend !
S. M