Timkarḍit n tezlit taqbaylit tettnarni deg ass γer wayeḍ, s icennayen iqburen d yimaynuten, s isental d uẓawan yemgaraden, yal ass yettili-d umaynut swayes igemmu yedles amazi&gamma,;d unarni n tẓuri. Akka, taẓuri ur tesεi ara tilisa, tessengugga idurar, tzegger lebḥur, tcerrig igenwan, ur tettağğa amḍiq, yal tiɣmert di ddunit tewweḍ-it. Anaẓur yessen d acu i d azal n tẓuri, yeẓra d acu i ilaqen ad t-yernu i tussna n tẓuri, yettḥussu d anafray, ismendag allaɣ-is, iẓemmi-t akken ad iniwel taẓuri swayes yezmer ad d-icekti, ad yessufeɣ afrayen-is, syen ad yezreε tamusni-s d tẓuri-s. Ait-Ferhat dyiwen ger icennayen i yesnarnin di tezlitt n teqbaylit, yufrar-d deg seggasen n 80, yelḥa-d amecwar γezzifen s tmedyazt zedigen. Ait-Ferhat ur icudd ara ɣer yiwen n umḍiq, cnna-ines ileḥḥu, yessuruf tilisa, irezzef si wa ɣer wa, yerna igellu-d s lɣella, d ccna ur nesεi taggara. Dima yettlalay-d umaynut ɣef umaynut. Ait-Ferḥat issem-is aḥeqqani Ferrat Mabrouk, d yiwen ucennay n taddert n At-Salaḥ, taγiwant n Wizgan. Si temẓi-s yeččur d tayri n ccna, imi yebda icennu ass-mi yesεa 13 n yiseggasen di laεmer-is. Tasfift tamenzut-is isekles-itt deg seggas n 1982 di Lzzayer tamanaγt, anda tasfift-agi tesεa 08 n tezlatin ger-asent; A ṭṭir ak-ceggεa&gamma,; A Baba, Mačči d tiğğin ikem-ğğiγ a taddert ideg llulaγ d tiyaḍ niḍen. Yuγal yesekles tasfift tis 02 deg seggas n 1985 i yesεan 08 n tezlatin. Deg tallit-ni, At-Farḥat yella ixeddem di Lzzayer tamanaγt (comptable) di tama n Sidi Moussa almi d aseggas n 1987, anda i yunnag γer tmurt n fransa. Dγa di tmurt n Fransa, Ait-Farḥat icennu di deqs n tmeγriwin di tzeγwa n Lpari d marssay, ama di tmeγriwin ama di tmesbaniyin, maca iseggasen-agi ineggura yaḥbes ur ixeddem-ara timeγriwin. Dγa timkarḍit n ccna n Ait-Ferḥat d tamarkantit imi deg ussan-agi iεeddan, amenzu n maggu 2013, yessufeγ-d asidi s usentel Mi d-teγliḍ s yir aḍaṛ, di tezrigin « Star plus » di temnaḍt n Bgayet i yesεan 08 n tezlatin. S wakka, Ait-Farḥat yeṣaweḍ yesεa 12 n isidiyen (tisfifin), ayen yugaren 96 n tezlatin.Γer tagara Ait-Ferḥat yessarem dakken tasuta n tura ad-ffken azal i ccna n teqbaylit i yellan zeddig, muḥal ad-yames, akken i yessuter deg cennayen leqbayel akken ad-qedcen aṭaṣ γef weḍris d useggem usefru.
Islam Bessaci