Ɣas yegget umeslay ladɣa di tɣamsa ɣef usenfar n uheǧǧi (projet de révision) n tmendawt n tmurt maca ula d yiwen ma yessaweḍ ad d-yawi isallen yerzan imdanen i yetkelfen s uheǧǧi-yi neɣ acu n umaynut ara yilin deg-s neɣ melmi ara d-tban tmendawt-a tamaynut. Deg wagur n yebrir iɛeddan, yiwet n terbaɛt n yimeɣnasen n tmaziɣt ideg yella: Mohamed BENNANA, Madjid BOUMEKLA, Ahcène BOZETINE, Saïd DOUMANE, Aziz FERNANE, Youcef HEBIB, Hacène HIRECHE, Saïd KEJAT s leɛnaya n ucennay ameqqran Idir ; ssufɣen-d yiwen n wulɣu ideg d-necden akk iɛeggalen n tmetti tazzayrit ad nedhen s tezmert-nsen akken tamaziɣt ad tuɣal d tunṣibt di tmurt n Lezzayer. Rnu daɣen, tarbaɛt-a n yimeɣnasen, thegga-d yiwet n tenfalant (pétition) s ttawil n lantirnat ɣef wadeg: www.Tamazight-officielle.com ideg stenyan ar ass-a d luluf n yimdanen seg-sen inaẓuren, udmawen n tsertit, inelmaden, iselmaden,… ama di tmurt neɣ beṛṛa i tmurt. Akken ad nesmekti, tamaziɣt tekcem di tmedawt n tmurt d tutlayt taɣelawt deg useggas n 2002 mbeɛd tidyanin n tefsut taberkant ideg ɣlin 126 d ilemẓi di temnaḍt n Leqbayel; am wakken daɣen i tuɣal d tunṣibt di tmendawt n Lmeṛṛuk deg useggas n 2011 s uheǧǧi i yexdem ugellid Muḥemmed Wis Seddis i tmendawt mbeɛd tidyanin n umussu n 20 fuṛaṛ. Ma di tmurt n Libya, deg ass umenzu n yennayer 2013, nnejmaɛen yimeɣnasen n tmaziɣt di Tṛablus anda i mtafaqen dakken tamaziɣt yewwi-d ad tili d tunṣibt deg tmendawt talibit n yimal. Di Lezzayer, amennuɣ ɣef uṣenṣeb n tmaziɣt d aqdim, d taneqqiṭ yellan d lsas ɣer Umussu Adelsan Amaziɣ MCB seg wasmi i d-ilul deg yiseggasen n tmanyin. Ma d astenyi n tenfalant(pétition) i d-sufɣen yimeɣasen n tmaziɣt iɣef d-nettmeslay ɣef wadeg n lantirat : www.Tamazight-officielle.com ; mazal yettkemmil madam asenfar n tmendawt yefka-t unebdu i lexṛif !
Mokrane Chikhi