Am yal tawilayt, yal taɣiwant, Ayt Smaεel temmekta-d, terna tesmekta-d ass deg yeddem iḍarren-is uneḥṛas (colonisateur) afṛansis seg akal azayri, timunent i d-yusan mbaεd imi yeɣli umelyun d wezgen d argaz d tmeṭṭut. Ass n wass-a taɣiwant n Ayt Smaεel aql-itt d tin yessaramen, iqeddcen, ibennun i yimal yeǧǧuǧgen deg yal aḥric.
Imi yal tanfust (exploit) d yal asenfaṛ yettas-d ala s lebɣi asertan, yeqqen i wexxam n tɣiwant n yal tamnaṭ nefren ad nager tiɣṛi i Mass Sadeq Rebbaεi ay yellan d amεawen, d afus ayeffus n uselway n tɣiwant Mass Nasiṛ Ɛebdun aɣ-d-yemmeslay ɣef kra n tneqqiḍin. « ad d-iniɣ s lferḥ d ameqqṛan imi nella ass-a gar wid yefkan tudert-nsen akken ad tidir tmurt n Lezzayer deg talwit. Iseɣ ameqqṛan i wid yemmuten ur ẓrin timunent… Ɛebban d watmaten-is, ṛuḥen ǧǧan-d talwit ɣer deffir. Iseɣ daɣen i wid mazal ar ass-a ddren gar-aneɣ ad asen-isseɣzef Ṛebbi di laɛmer-nsen, deg lawan anda wid yeẓran azal tesɛa timunent n tmurt sɛeddan ẓẓur d tebrek n tegrawla ffɣen-d ɣer yiberdan ttmeǧǧiden, nnecraḥen, ttuɣen deg yizenqan s lferḥ, llan wiyaḍ summten lexdaɛ dɣa zwaren ukren tuččit imi rẓan tiwwura wwin akk i cahan akken i as-yenna umedyaz ».
S wawalen-ayi ay yebda Mass Rebbaεi awal-is, aneggaru-ya ay ttuɣ d aselway n tidukkla n Wedrar n Fad, tura yekcem ɣer wennar n tsertit, dɣa yenna-yaɣ-d ɣef waya : « d tidet, di tazwara ad snemmreɣ meṛṛa wid akked tid aɣ-yefkan tiqqa iwakken ad nennaɣ s yisem-nsen neɣ ahat deg umkan-nsen ɣef lexṣas i ad ten-iḥuzan, yerna iḥuza akk tiɣiwanin n tmurt n Lezzayer, nekk s yisem-iw am wid iyi-yecban, kecmeɣ-d i wannar n tsertit iwakken ad xedmeɣ afrag i yikabaren n udabu neɣ n leḥkem amsebaṭli ur ḥekmen deg tɣiwant-nneɣ, d assinef n terga n lbaṭel ɣef yimezdaɣ n tɣiwant n Ayt Smaεel ɣas akken lliɣ tura deg umennuɣ asertan imi ẓriɣ d imennuɣen yellan kifkif-iten. Abrid i d-wwiɣ deg yidles nekk d yimdukkal-iw mačči d ayen isehlen ɣef yiwen iwakken ad t-ibeddel imi ḥsu dakken helkeɣ yiwen n waṭṭan ḥellu-yis d leqdic ɣef yidles yerna idles aqbayli… ».
Ur yezgil Mass Rebbaεi aḥric n leqṛaya ay yesεan azal, ladɣa tasnawit n Ayt Smaεel : « yuzzel wawal ɣef tleddayt n tesnawit n Ayt Smaɛel ad ak-d-iniɣ dakken ma ira Yellu tasnawit ad teldi tiwwura-s i yiswiren amzwaru d wis-sin (1 d 2 ème AS), ma yella acuɣeṛ ur teldi ula deg yiseggasen yezrin acku llan-d aṭas n yisergalen, amezwaru tasnawit d asenfaṛ yellan meqqeṛ, iḥwaj akud d tedrimt yerna akken tezriḍ belli yella lexṣas deg wakal&hellip,; asnemmer d agaɛmir i yimawlan n wakal, lukan mačči d nutni tili d awezɣi ad yimid usenfaṛ am wa, amkan d win iwaεren i lebni, rnu ɣur-s tadbelt-nneɣ (administration) teẓram akk tikwal tettak-d afus, tikwal tettak afus txeddem-d isergal. Ihi ɣas ad tthennin warrac-nneɣ, dɣa ad asen-barkeɣ i wid akk i d-yewwin ikayaden n BEM d BAC, nekkni s imdebbṛen n tɣiwant dima nxeddem-asen kra i usebɣes, ma d wid ixeṣren ad asen-iniɣ afud igerrzen i qabel ».
Ma ɣef uɣawas (plan) n usegmu n useggas-a Mass Sadeq yebra-d i tefyar-a : « isenfaṛen nniṭen llan, gar-asen PCD, ilaq ad ner awellih, ad nesmekti iman-nneɣ belli deg lawan anda meṛṛa timura n ddunit ttcahant deg tmurt n Lezzayer deg lerbaḥ tesɛa, ad naf Azayri meskin ixuṣ deg kullci, ama d axeddim neɣ d ayen akk yeḥwaj yiwen deg tmeddurt-is n yal ass acku mara nsel i uɣawas n usegmu n tɣiwanin ad yisnaɛjeb yiwen seg tedrimt i d-tettak tedbelt n tmurt-nneɣ neɣ imawlan udabu. Ḥsu belli d taḍsa, acku d ayen ur yezmir yiwen ad yamen ma yella tzemmer tɣiwant ad teddem ixef-is neɣ ad tegmu s drus n tedrimt i d-ttakken, nniɣ-ak a gma Mhenni adabu-ya am win yettṛebbin ibki, ur d-itekkes taḍuṭ, ur d-iteẓẓeg ayefki, ur tleḥḥqeḍ aksum… ».
Mhenni Xalifi