Seg wass nni n lexmis i tebda temlilit n umezgun amaswaḍ deg At Yanni. Xas aṭas n ttawilat i ixuṣen, maca am yal aseggas, ur yezgil ara umezgun ttiɛad-is d taddart n Wegni Ḥmed. D tidukla tadelsant Aẓar i d-yettheggin timlilit-agi n tẓuri tis kuẓ (4).
Seg mi teldi tafaska tiwwura-s, aṭas n tceqqufin umezgun i iɛeddan. Tirebbuyaɛ i tent-id-isweǧden usant-ed seg waṭas n tamiwin n tmurt, am: Berǧ Lkifan, At Waban, Laṛebɛa n At Yiraten, Illulen, Agni Furru, d tid d-sbedden yelmeẓyen n tuddar n At Yanni. Yal ass, ttilint snat n tmezgunin. Di yal tikelt acu n yizen i refden-t, acu n teɣri i ggarent.
Tafaska-agi n semmus (5) wussan ad tessali s ṛeḥba n ṭbel d zzedwa ara sseḥmun icennayen n teqbaylit. Akka i tefka tidukla Aẓar tagnit i umezgun ad yidir xersum yiwet n tallit deg useggas, ad d-smektin imdanen s wazal yellan deg-s.
Ayya yekkes lxiq i twaculin i ikemnen acḥal i tegrest n ccetwa, d wid d-yusan ad inigen deg tirga n umezgun ddaw n tduli n yitran n unebdu.
Lameyya Urak