Acu mazal ad d-nini
Af lxir ur nettuɣal
Yiwen wemɣar zik-nni
D netta i d-yeǧǧan awal
Ixdem lxir mekin, ixdem lxir aṭas, aṭasd… ktra din akk iqqul-as d lexmir. Texser nniya-s dayen kan. Yuɣal amer yettaf ur iẓẓer yiwen, ur t-iẓẓer yiwen. Weḥdes kan. Am uccen ugemmaḍ-nni qqaren.
Acu mazal ad d-nini
Af lxir ur nettuɣal
Yiwen wemɣar zik-nni
D netta i d-yeǧǧan awal
Netta tura ɣur-s ciṭuḥ n lexla akkenni. Ɣur-s ciṭuḥ n lexla, isɛa dina tazemmurt. Tazemmurt-nni ihi ssnen-tt akk medden. Amek i tt-ssnen akk medden ? Skra n win yeɛyan deg werwiḥ-is, ad aɣ-inǧu Rebbi iǧu lmumnin, s kra n win yeɛyan deg werwiḥ-is, mi yegla kan s temrart ad iruḥ ar tzemmurt-nni, ad iɛelleq iman-is dinna. Ayen din i tt-ixedmen, ar dina kan i ttruḥun. Dɣa tazemmurt-nni ssnen-tt akk medden.
Acu mazal ad d-nini
Af lxir ur nettuɣal
Yiwen wemɣar zik-nni
D netta i d-yeǧǧan awal
Yibbwas ata wemɣar yusa-d ar tejmaat. Wamag iffeɣ akk ttufiq an taddart. At taddart wehman akk : « a wellah a d netta ayagi !… mačči d netta !…. a wellah ar d netta !… ». Tettalaseḍ dɣa mi d-inṭeq, immut wawal. Ccct ! Ssusmen akk, smeḥsisen. Acu sen-yenna ?
Acu mazal ad d-nini
Af lxir ur nettuɣal
Yiwen wemɣar zik-nni
D netta i d-yeǧǧan awal
Acu sen-yenna ? Inna-yasen : « Ay at taddart, tessnem akk tazemmurt-nni-inu. Nekkini tura, aqli friɣ-tt akk d rray-iw, gar-aɣ d wass icban ass-a, ad tt-qlaɣ. Tura, nek nniɣ-awen-d, akken ma yella win yeɛyan deg iman-is… ad isegger iman-is, ah !…. »
Acu mazal ad d-nini
Af lxir ur nettuɣal
Yiwen wemɣar zik-nni
D netta i d-yeǧǧan awal
Muḥya