Σlaḥsab n tmesbaniyin i d-yettilin deg Libya, imḍebbren n leεḍil n tmurt-a ukren taqejjart γer deffir mebεed mi ṛeggmen i Yimaziγen i wakken ad d-lhun s temsal nsen, ladγa, ayen yeεnan tameslayt d yidles.
Γef wakken i d-yenna Mass Fethi Bouzakhar, yiwen umeγnas aqdim n tmaziγt u d aselway n useqqamu unnig n Yimaziγen n Libya (HCAL) :’’mačči kan ugin yimḍebbren ad stεerfen s tamziγt, meεna bγan ad tt-snegren. Ur bγin ara ad d-skeflen laṣel n tmurt, bγan ad teqqim d taεrabt akken i tt-bγan nutni. Ihi, ilaq ad ḥsun ass-agi, ma Imaziγen n Libya ur qbilen ara adabu, yiwen deg-sen ur yiberru i leslaḥ-is. Ur nesrusuy ara leslaḥ, skud tamaziγt mačči d tunṣibt.’’
I usmekti, 50% n wid yesseγlin Kadhafi d Imaziγen n Libya. Di lweqt-nni imi teḥres, msefhamen akked Waεraben γef waṭas n temsal. Acu kan, akken kan ‘’testaqel’’ Libya, yuγal-d leḥkem aεrab-ineslam amesbaṭli i yenwan d Rebbi i ten-iεuzzen yerra-ten d imḍebbren, akken i d-yenna Mass Fethi. Dγa, s yimir i d-bdant tmesbaniyin n Yimaziγen. Wwḍen armi γelqan ula d iqudas n lgaz (Oléduc) n tama n Lalut (Nalut).
Ihi, deg taggara-a, walan ur yelli d acu ay d-ssulin daymi i bγan ad beddlen ttawil n umennuγ xas ulamma s talwit. Gar wayen ssaramen, timanit i temnaḍin timaziγin.
Hocine.M