Imezdaɣ n taddart n Fraksa, i yettabaɛen ɣer tɣiwant n Wad lberdi i d-yezggan ɣef unẓul n ussamer n waɣir n Tubiret, xedmen lḥers meqqren ddurt i iɛeddan ɣef yimḍebren n tɣiwant akked lwilaya iwakken ad ɣelqen takubanit i yettruẓun aẓru s lminat, acku tḍur s waṭas tawennaṭ ideg ttidiren. Maca, annect-a d ayen i d-wekkden imezdaɣ n taddart-a, rnu ɣer waya nnan-d dakken seg wasmi i yebda yimḍebber n tkubanit-a s truẓi n uẓru ttidiren deg yir liḥala, acku ttwaḍuren s uɣebbar i d-yetteffɣen ama deg tzemmer-nsen neɣ deg yixxamen-nsen i yeččuren d iɣisan seg lminat, d ugama s umata. Ɛlaḥsab issalen i aɣ-d-yewḍen d akken timlilit i d-yellan gar uselway n twinast (daira) akked igensasen n taddart-a ur sawḍen ara ad msefhamen, acku ineggura-a ttwalin tifrat i asen-d-yefka ur ten-taɛjib ara, acku tifrat-a teqqen kan ɣer uḥbas n yikumya i yettawin iẓra dakken ur ttɛeddin ara seg tlemmast n taddart. Deg lawan ideg ttwalin yimezdaɣ-a dakken tifrat n wugur-a ur d-ttili ara ḥaca ma teḥbes tkubanit. ɣef waya i sutren seg yimḍebren n twinast i wakken ad d-ceyɛen tarkeft (comité) i wakken ad tt-ẓer lḥif ideg ttidiren, syin akkin ma yella ur tteḥbisen ara deg wazal n ddurt ad d-uɣalen ɣer tmesbaniyin.
Bousbaine.S.