Ma nekkes ṛebεa neɣ xemsa n wussan, segmi i d-llant tuɣalin s tɣara tunṣibt ɣer tɣuṛi almi d lexmis iεeddan, inelmaden n tesnawit Maεuc Idris ur ɣɣaṛen. Γef ineɣmisen nesεa, annect-a akk yekka-d seg tkemmict n warrac i d-yettwaḍeggren seg uɣerbaz mbaεed imi εawden ugar n snat n tikkal deg uswir asnawan ladɣa aḥric aneggar BAC, neɣ wessren din, yettusemma tillit-nsen deg tesnawit tfat amdur-nsen. Arrac-a ihi ur keccmen i uɣerbaz ur ttaǧǧan win ara ikecmen. Yal tasebḥit ad qessεen imanen-nsen zdat wawwur (portail) n tesnawit ad gen tagant (grève) almi uɣalen warrac at nniya s ixxamen-nsen, ad tthennin. Almi d ass n lexmis yezrin ulac win i d-yegran iman-is akken ad yefru aɣbel acku akka ala inelmaden i yenṭerren. Ula d ibabaten n warrac i terza temsalt, sεuẓẓgen imeẓẓuɣen-nsen i wayen iḍerrun neɣ wis d acu d anamek-is waya. Kra n yibabaten i irezzun i tesnawit deg teswiεt-a ala wid i yessuturen tuqqla n tarwa-nsen i d-yettwatelfen, ma d wid ara yessutren ad tqaεed tegnit d waddad n warraw-nsen ad keccmen ad ttaɣen timsirin, ulac. Anemhal n tesnawit yenna-d yakan belli ur yezmir akk ad yesnubget tikkelt tayeḍ inelmaden-a iwessura deg uɣerbaz deg yeddebbiṛ, ma d yiwen seg yiselmaden yenna-aɣ-d: “ arrac-a i ad tt-yettreyyiεen i wid yebɣan ad ɣren, tura ay d-ttmektayen aɣerbaz d wazal n tɣuṛi, umma deg teɣzi n useggas ur ssinen amek yemmug weqrab-nsen daxel, tura yewwi-d ad ǧǧen amḍiq i wiyaḍ acku tizzya-nsen sεan turagt deg tesdawit”. Deffir n wayen i d-yellan iga unemhal d yiselmaden agraw akken ad mcawṛen ɣef taluft tikkelt nniḍen wissen ahat ad uɣalen waman ɣer tregwa-nsen.
Mhenni Xalifi