Tagara n ddurt-agi, Tiddukla tadelsant Itran n At-Laḥsen, n tγiwant n Yillulen Umalu, snaεten-d i tikkelt tamezwarut yiwet n tecquft n umezgun s wazal-is deg wexxam n umezgun Kateb Yasin n temdint n Tizi-Wezzu s leḥdur n deqs inaẓuren d twacult n yidles. Tecquft-agi semman-as; « Tayri Teğğa Tmacint », d yiwet n tecquft id-kksen di tullist n wemyaru ANTON PAVLOVITCH Tchekhov N tmurt n Rrua. Tasuqilt-is di tutlayt n Trusit γer tutlayt n teqbaylit, tella-d sγur SAIDOUN Jugurta, yiwen uεeggal i iqedcen nezzah di tarbeεt n umezgun n tddukla Itran n At-Laḥsen, ma yella d win yellan γef uqaru usuffeγ d ucebbaḥ n tecquft-agi (Mise en scene),d mass MOKRAB lyes, d yiwen umedyaz u d anaẓur n temnaḍt n At-Yiraten, anda i yukka deg usuffeγ n deqs n tecqufin n umezgun, ger-asent » NASS MECREYA » id-snaεten deg seggas n 2011 akk d tecquft umezgun niḍen s usentel « AZAL N TLELLI », deg wexxam n umezgun Kateb Yasin n Tiz-Wezzu. Ma yella d aẓawan sγur ssin n yinaẓuren yetwasnen deg annar n ccna, wigi d KEZZAR Muḥend Waεli d Nabil CHERIFI.
Dγa ma yella neffka-d agzul γef tecqquft-agi umezgun, tewwi-d awal γef yiwet n twacult imi d-wwin lğanaza, maca mačči nsen, dacu kan uggur mačči d wagi, acku uggur ameqqran anwa amdan ara yessiwḍen lexbar iwergaz iwumi temmut tmeṭṭut. Anwa ara s-yinnin tameṭṭut-ik temmut? Dγa ceyεen yiwet n tmeṭṭut, dacu kan tameṭṭut-agi uqbel ad d-tawweḍ γer wemḍiq ideg tḥebes tmacint ( La gare), anda i yuγ lḥal ixeddem wargaz-nni, tekcem γer tberna anda id tufa kra n yiγilifen.
Mi tewweḍ γer wergaz-nni, tezzi-as akken ad yeddu s axxam. Dγa dagi i tebda tettlal-d tayri n tmeṭṭut γer wergaz.
Tarbaεt id yurraren di tceqquft-agi llan deg-s 08 n yelmeẓyen, wigi d ; Saidoun Sofiane, Alleg Mahdi, Bellagh Mourad, Belkebir Yamina, Kessir Mouloud, Talbi Kenza, Saidoun Salim d Fedoul Kamer. Tarbaεt umezgun n tddukla Itran n At-Laḥsen n tγiwant n Yillulen Umalu, dyiwet n tddukla i iqedcen aṭas deg annar, id-yeffkan i yedles n teqbaylit, imi deg ass imi d-tlul deg seggas 2004, ar ass-a turar-d nnig n 50 n tikkel n tecqqufin umezgun s yisental yemgaraden, akken daγen i tmetel lwilaya n Tizi-Wezzu di deqs n tmesbaniyin id-yeḍran di lwilayat yemgaraden n tmurt, ama d i Batna, Bumerdes, Lzzayer Tamanaγt, Σennaba , Mustaγanem, Bgayet d iyaḍ niḍen.
Islam Bessaci