A win i heddren fell-i
Nek ɣur-i terreẓ ccada-k
Tessuliḍ-i s igenni
Iqqim-iyi-d ala ayla-k
Ma yella tkemmel akkagi
Ɣas ṭṭef imi-k nniɣ-ak
Tenniḍ-as d bab n nnif
Lḥerma d lefhama
Argaz ittqeddimen lḥif
Ittxemmim i taggara
Nukni nteddu bessif
Acu i ɣ-yeǧǧan akka
Tenniḍ-as ur yettagad
D wiki i d izmawen-nni
D afeḥli yekkat zznad
Mi yekker, adrar yeɣli
Nukni mi nesla terɛed
A(d) nexmet s ddaw tduli
Tenniḍ-as mi(d) i-yeggul
Mi k-d-inna awal mačči sin
Bab n laqel d lmaqul
Di tidet i yessisin
Nukni a neger-ik ay ul
Netturar di temqessin
Tenniḍ-as win d lmumen
Ur iḥeqqer, ur iṭṭellim
Rut a wid i d-yeqqimen
Ala ass-a mi t-tettwalim
Nukni nella d imcumen
Times-nneɣ s ddaw walim
Tenniḍ-as d bu imelyan
Am netta ḥed ur yelli
Iǧgâ-d amkan d azedyan
Deg wulawen ur iɣelli
Ma d nek lliɣ d afuḥan
Am nek am medden irkuli
Mohia