Imezdaɣ n taddart n Umesyun i yettabaɛen ɣer tɣiwant n Tmeẓrit, i ibaɛden s wazal n 40 yikilumitren ɣef umalu n lwilaya n Bgayet, ɣelqen ttlata iɛeddan abrid wis 26, ssebba n wuguren i ttidiren yal ass . Tamesbanit-a i xedmen tella-d d tiririt i yimḍebren n tɣiwant akked lwilaya acku waɛdenten-id d akken ad d-rren lbal-nsen ɣer taddart-a, maca deg tidet acemma ur t-id-xdimen. Ɛlaḥsab imezdaɣ n taddart-a, nnan-d d akken ttidiren lexsas n waṭas n wallalen n tudert, acku ur sɛin ara lgaz n temdint i ten-yettaǧǧan rewwun lḥif ladɣa deg wussan n cctawi, rnu ɣer-s lexsas n yiberdan akked trisiti n yiberdan d wayen-nniḍen, d anect-a i ten-yeǧǧan ad xedmen tamesbanit-a iwakken imḍebren ad d-gren tamuɣli ɣer-sen. Ihi d annect-a i d-yellan acku msefhamen yid-sen yimḍebren d akken ad d-afen tifrat i wuguren-a i ttidiren acḥal d aseggas.
Bousbaine.S.