Tama n Ṣumam, i d icudden aṭaṣ n tɣiwanin, atta-n deg yiwwet n liḥala ur tessefraḥ ara. Ṛṣaḍ neɣ iḍuman nernan dayen kan deg temdinin d tuddar n tama-agi. Ussan-agi ineggura, rsaḍ « flen-d » ɣef kra n tɣiwanin, am Aqbu, Amalu, At Cemini,…imi tigi ur ufin-t ara s anda ad rrent iḍuman , yuɣ lḥal imezdaɣ n taddart n Bizyu i d-yezgan deg tɣiwant n Amalu, ugin aten ǧǧen ad ḍegren rṣaḍ ɣer tama nsen, i d-yezgan ɣef rrif n wasif n Ṣumam. Imezdaɣ-agi rfan imi nnan-d belli dduxan lakked yir rriḥa yettawi-ten-id waḍu ar tama nsen, ayagi yerra imezdaɣ-is ur zmiren ara ad snufsen ! Anect-a d tidet, d lemḍerra i yimezdaɣ n Bizyu, d acu kan aɣbel-agi yewwi-d daɣen lemḍerra i tɣiwanin nniḍḍen am Aqbu. Tamdint n weqbu teččur d rṣaḍ. Imdanen ur zmiren ara ad ddun deg iberdan mebla ma ɣelqen anzaren nsen, acku yir rriḥa tesṭeɛṭeɛ liḥala ! D ayen n wala s timad nneɣ, imi agudi yezzi-d akk ɣef temdint. Ayagi ixelq-d tugdi dakken ma yella tkemmel akka, yezmer lḥal ad d-nulfun waṭanen. Iḍuman llan deg yal lbatima, zdat n yixxamen, ɣef yiran n yiberdan,…Lḥala-agi atta-n tdum nnig n krad n smanat, u mačči d awezɣi ad tɛeṭṭel, imi tifrat i tezɣent-agi ur ɛad ur tban. Aɣbel-agi n yiḍuman yella acḥal aya deg tama n Ṣumam, ar ass-a imḍebren ur s-ufin ara tifrat, imi myal tikkelt ara ɛerḍen ad gren isenfaren n CET, anda arṣaḍ ad ttwaǧemɛen, yerna akken ilaq, imezdaɣ reffun, ttasen-d mgal isenfaren-agi. D wagi i d aɣbel amuqran. Tura akka, tama n Ṣumam « tfuḥ », tellufḍa. Ama d issafen, neɣ d iberdan, neɣ d timdinin lakked d ttudar, rṣaḍ yenerna nnig lazem. Medden ur asen-d icliɛ ara, ttḍeqiren iḍuman anda ufan…
Syfax.Y