Buddeγ-ak ayen iγef ur tebniḍ, ad n-yaweḍ d tamuffirt.
Els-it deg-k twaliḍ, ṣṣubb anerfud n tcenfirt.
Nnaγ amek akka telliḍ, tγeḍleḍ-d γef yiman-ik taqfirt.
Yya nekk nniγ kečč tesliḍ, uγal-d d timendeffirt.
Uγal-d ad twaliḍ aha, feṛṛeẓ tura amek telliḍ.
Nessew-ak-d timucuha s yeftaten n wayen tezliḍ.
Ečč tura ayen akk icedha wul-ik ad tekkreḍ teḥliḍ.
S tezmert-ik ma yelha, awi-d kan ar d ad t-twaliḍ.
D tunṭict tuklaleḍ tagi, d kečč kan i wumi tt-buddeγ.
Ax-tt-in ihi ass-agi, ad ak-tt-in-fkeγ beddeγ.
Σezrayen-ik ad yergagi, seg wul i d ak-tt-in-muddeγ.
Ečč, els lebγi ur yettagi, d iḥulfan i k-ncuddeγ.
Ṭiṭṭuc tidet i la k-teqqar, La tetturar yid-k tuqqna tuffra.
Ṭṭef lfal-agi meqqar, ur tcuḥ ur tkukra.
Akka afus-ik yekkaten ccqer, ad t-tessiḥnen tmara.
Yak mačči d abuneqqar, asefru-ya d bu tsura.
Sεid At Mεemmer