Yella-d uheggi ameqqran i usfuggel n tefsut n yimaziɣen d tefsut taberkant di tesnawit n Naser ddin Mceddali di Tubiret. Aheggi-a, ur d-yusi ara kan akka ɣas tanmehla n tesnawit di tazwara tugi. Aya, yeǧǧa inelmaden xedmen aḥabs ɣef tɣuri n yiwen n wass, ugin ad ɣren almi i d-yettuneqbal usiwel-nsen. Ass-a n 20 di yebrir 2009 inelmaden akk n tesnawit banen-d s wudem amaynut ilmend n tmeɣra-ya.
Tameɣra i d-yettwaheggan di lmendad tebda-d s ddqiqa n tsusmi, d tiririt n tejmilt i wid yemmuten ɣef tmaziɣt syin yella-d umeslay n tazwara sɣur imḍebber n tuddsa n yimawlan n yinelmaden anda i d-yessebgen tumert-is ɣef wayen d-heggan yinelmaden-a daɣen yergem-asen afus n tallelt sya d asawen. Tkemmel tmeɣra s yisefra yekkaten ɣer wul d wallaɣ,; asarag s ɣur Ɛemmarin Ḥemmu ɣef umezruy n tefsut n yimaziɣen d tefsut taberkant. Taceqquft n umezgun d tin d-yernan sser d unamek i tmeɣra ɣef uselmed s umata deg uɣerbaz azzayri akk d uselmed n tmaziɣt d wazal-is di tmetti-nneɣ.
Tameɣra d tin ikemmlen almi izeggen wass neɣ ugar s tezlatin d yisefra s waṭas n usirem iwakken ad kemmlen abrid i d-neǧren yimezwura, Tanemmirt a Aḥsen, a Hicam, a Massi, a linda d wiyaḍ merra. Afus deg ufus, taεkemt ad tifsus.
Toudert hassina