Ass n letnayen 20 di yibrir 2009, tella-d yiwet n temsbanit di Tizi-Uzzu, i d-yesmektan amulli w-29 n tefsut n yimaziɣen. Yiwen ur iruja ad d-tili akken! Aṭas i as-yenwan diɣ i as-yennan tamnaṭ n Leqbayel dayen teεya, tebra i wacḥal n yiseggasen n umennuɣ…
Maca tamsbanit ɣur d-yessawel umussu n timanit n tmurt n Leqbayel i d-yesdukklen luluf n yimdanen ar yiwen n umkan (le rond-point) ɣef 11 n ssbeḥ,; tesbeggen-d udem «ameɣnas» n temnaḍt-a… Tikelt-a, tamdint n Tizi Wezzu telli akk tiwwura-s am wussan-nniḍen, yeffeɣ-d meẓẓi meqqer, argaz tameṭṭut mebla tugdi… isuɣan n yimsabaniyen-agi d asmekti, d azul i yimeɣnasen imaziɣen, i wid yemmuten ɣef tmaziɣt, ma d awal n wid d-iheggan tikli-a yewwi-d ɣef tefsut n 80 d tefsut taberkant… Γef wamek bɣan d wamek ssaramen azekka n Leqbayel (timanit) d tmaziɣt. Ayen yeṭṭfen ddhen-nneɣ,; d ixulaf-nni n uɣerbaz amezwaru n Boukhalfa i d-yusan, ad kemmlen asenfar-nsen ɣef tefsut-agi, ɣer timsikent i d-yellan di tesdawit n Mulud Mεemmri anda i steqqsan wid i yufan din. Am wakken daɣen, i d-yusa ɣur-neɣ yiwen ubabat, i yelḥan akked mmi-s, akken ad aɣ-d-yini mmi-s-agi isemma-as « Toufik Naaman » s yisem n winna yemmuten di tikli-nni n Lezzayer ass 14 yulyu. Timlilit i d-yennan «mazal-aɣ da!» tekfa di talwit ɣef 2 n tmeddit.
L. Urezqi, Dj. Ahitaghel