Ɣef leḥsab n yiqeddacen n Uḥuddu aɣarim, tendeh tmes deg semmus n yimukan yemgeraden di twilayt n Bgayet. Ar tura mazal ur d-tban tmentilt n undah-a, lameεna ssegran-d axeṣṣar deg yimeḍqan-a, ladɣa arɣay n ttjur d yimɣan.
Iqeddacen n Uḥuddu aɣarim, xedmen axeddim-nsen, dɣa gren-d iman-nsen deg wakud ilaqen. Ass n 06 deg meɣṛeṣ ɣef 14:40 deg taddart Iwrissen, di tɣiwant n Tizi n Berber, rɣant azal n 2 500 m2. Ma yella di tɣiwant n Bgayet, deg umḍiq iwumi qqaren Ikubab, rɣant ugar n 3000 m2. Ad d-nesmekti d akken, ayagi yeḍṛa-d deg yiwen n wass ɣef 18:30 n tmeddit. Seg tama-nniḍen, tikkelt-a di tɣiwant n Tizi Ɛeyyad, i lewhi n 21:05 n yiḍ, tessreɣ tmes yiwen n useklu.
Ula d Taɣiwant n Melbu ur teslik ara seg uxeṣṣaṛ-a, imi rɣant deg-s ugar n 8 000 m2 ɣef 22:00. Imezdaɣ n tɣiwant-a s umata, irekb-iten zzεaf d ameqqṛan, acku ur ẓṛin ara d anwa i deffir n temsalt-a, i yellan d tementilt n uṛɣu n teẓgi tacebḥant i d-yezzin i tɣiwant n Melbu. Gar-asen aselway, d yimeltaɣen n tddukkla Awal Yessawal, i yesnemmren iqeddacen n Uḥuddu aɣarim ɣef ufus n tallelt i asen-fkan i yimezdaɣ n temnaḍt-a, armi ṣṣawḍen ssensen times-a uqbel ad d-teglu s temḍerrit-nniḍen.
Seg tama tayeḍ, deg temnaḍt n Tizi Ḥmed, deg tɣiwant n Ticci, yewweḍ ureqqas n umihi ɣer tseddart taεlayant. Tadyant teḍṛa ɣef 01:45 n tnezzayt, yerna times qrib tečča ula d ixxamen meḥsub, limer mačči d tiḥerci n yimezdaɣ, d ixeddamen n Uḥuddu aɣarim, i yessqedcen ugar n 7 n yikamyunen n ussens n tmes, acku deg yiḍ-nni yeqwa mliḥ waḍu. Lameεna ɣas gan ayen ilaqen, times tessreɣ ugar n 9 n yihekṭaṛen.
K. K.