Tessuddes-d teseqqamut n taddart n At Zɛim, yetabaɛen ɣer Tɣiwant n Mɛatqa, deg ledwar iɛddan, aṭas n twiziwin i usizdeg n taddart. Tusa-d tikti i lmend n waluy n temsizzelt n Useqqamu aɣerfan n ugerzu n Tizzi Uzzu i icudden ɣer taddart tazedgant deg ugerzu, n Aissat Rabaḥ. Yal taggara n ddurt, ttheggin-d yiɛgalen n teseqqamut n taddart tiwiza, s tallelt n Useqqamu aɣerfan n tɣiwant n Mɛatqa, d imezdaɣ n taddart yezdin afus deg ufus i usizdeg n wadagen n taddart, asewsaɛ n yibardan, awenneɛ n yizengan d yiɣerban n yixxamen n taddart. Mazal ar ass-a azal n twizi deg tudert n leqbayel, imi d lsas n tddukkli d tegmat gar yimezdaɣ n temḍiqt n leqbayel.
Ali Zalouk