Awal yuzzlen deg uẓeṭṭa n FB ɣef ssuma n tkeryas yessaweḍ iḥuza ula d iselman s wudmawen-is yemgaraden. Aya, nettwali-t deg wussan-a deg temdint n Tubiret d temnaḍin i as-d-yezzin d akken ssuma n yiselman yellan yakan tufrar nnig n tezmert n yimdanen, tessaweḍ ad d-tader deg leswaq imi tewweḍ ɣer 200 n yidinaren i kilu mi akken tella s 500 n yidinaren. D ayen yesferḥen mačči drus n twaculin, imi d asafar i ttraǧun i merra yimdanen tal tasebḥit. Ɣef leḥsab n wid i nestesqasa, aṣubbu-a deg ssuma yal wa amek i t-yettwali. Amezwaru i nemlal deg ssuq, yenna-d d akken d liḥala n tegnawt i d-yeglan s uzɣal i yeǧǧan ssuma n yiselman tṣubb-d, imi wid i t-yesnuzun ur zmiren ara ad t-fren nnig n yiwen n wass. Wayeḍ, yettwali d akken ssuma-a tuɣal ɣer uneḥbus n yimdanen ur t-nettaɣ ara, imi 500 n yidinaren ufrarent nnig n tezmert n umdan. Aneggaru, yenna d akken tiɣri i uɣunzu n usafar-a, tewwi-d lfayda i yimezdaɣ n Tubiret ara yeččen asafar-a s ssuma yettwaqbalen. Iwulem ad d-nesmekti belli mačči ala iselman i tḥuza temsalt-a n uṣubbu deg ssuma, maca ula d iyuzaḍ, udren-d deg wazal, imi azɣal iɛeddan isers-d tuggdi deg wid i ten-yettrebbin i wakken ad ssenzen s ssuma iwumi ara yezmer umdan.
M. Smail