Aselmed n tmaziγt ad yekcem γer uγerbaz n tmurt n Libya s wudem unṣib deg tazwara n useggas-agi i d-iteddun (2014), akka i d-yenna win yettmeslayen s yisem n tneγlaft n leqraya n tmurt-a. Aselmed n tmaziγt ad yettuḥettem deg temnaḍin timaziγin. Ad yebdu deg uγerbaz amenzu, seg useggas amezwaru alamma d wis 4.
Σlaḥsab n Mass Mustafa Ajala i yettmeslayen s yisem n tneγlaft, ‘’ha-t-an wejden yiselmaden ara yeṭṭfen axeddim-a u dduwla tebda la d-tessewjad idlisen’’.
Acu kan seg tama n tsertit, Tamaziγt ur tessaweḍ ara ad tuγal d tunṣibt deg tmendawt imi mazal wid i d-yekkren mgal cγel-agi deg Useqqamu Aγelnaw n Libya xas ulamma ddeqs deg-sen i t-iqeblen.
I usmekti, Amecwar n temsalt n tmaziγt yebda-d acḥal-aya deg Libya. Aṭas n tnekkriwin i d-yellan seg wasmi yeγli Qeddafi ar wass-a. Aṭas n leḥris s wayes i d-yegla umennuγ-agi γef tmaziγt : ssawḍen armi γelqen iqudas n lgaz ; syin msefhamen i wakken ur ttqadaren ara leqwanen n tmurt ma ur tettwaqqbel ara tmaziγt deg tmurt…atg
Hocine.M