Uqbel ad tebdu tallit n iweǧǧiben imdanen, yuɣ lḥal, tetterkabiten tawla yal mi ara muqlen tizemrin-nsen ittwaṛuccen kan s uzemmur. Llan-t kra nniḍen ula d aɛeqqa ur tesɛint. Imɣaṛen d temɣaṛin, mi ten-t-seqṣaḍ ɣef sebbat i yeǧǧan lɣella-yagi n uzemmur asmala tettuɣal ɣer deffir, deg useggas ɣer wayeḍ, ak d-inin d akken taɛjel teswiɛt, aṛṛeẓq ibda yettuɣal ɣer bab-is. Iɣmisen, ula d nutni yebbeḍ-iten zhir. Tineggura-yagi, sṭuqten awal ɣef lɣella-yagi yella-n tettwajmaɛ-ed deg m’ara d-udumen-t tmiqwa timezwura n lehwa, deg iweǧǧiben, alama ǧuǧgen ijeǧǧigen n tefsewt. Iṭij yella-n d aqesḥan, ɣef teɣzi n waguren n cutambeṛ, tubeṛ d wunbir, ifka-yas tiyita meqṛen i wzemmur. Yekmec sufella n ṭejṛa uqbel ad d-yeɣli ɣer leqqaɛa anda ikemmel aɣiɣed ar almi d-yegra deg-s ala aḥba. ɛeddan wussan uɣamac, tebɛen-ten wiyyaḍ deffir-nsen, azemmur yella-n, yuɣ lḥal, yettwaɣ, igubeṛ-it-id yiwen ubelɛuc umu qaṛen tizzitt uzemmur. Laḥsab n wayen d-eqqaṛen wid iqedcen deg weḥric n tfellaḥt, tizzitt-agi tesrusuy timellalin-is deg iɛeqqayen n uzemmur ayen tiserkayen u yettaǧǧat iɣelli-d. Ula d winna yeṭfen iman-is ur yemniɛ ara acku zzit-is d win ur nesɛi ara maḍi lbenna. Imawlan n tesyar, ula d nutni, ikcem-iten lxuf. Ibṛaḥen d-yezzin i tesyar-nsen yella-n, deg iseggasen iɛeddan, ttaččaṛen d iɛemmuṛen lak d tcekkaṛin n uzemmur, qimen, asegga-s, d ilmawen. « Aseggas-a ulac maḍi lɣella n uzemmur. Anda teddiḍ ad tafeḍ imdanen ttcektayen ɣef tyita-yagi ččan-t tzemrin, ama di Tizi Wezzu, di Bgayet, neɣ di Tugirett. Ilindi, akka lawan-a, nella nettaɛwaq amek ara d-naf nnuba i lɣaci yebɣan ad d-eẓden azemmur-nsen. Nxeddem am yiḍ, am was ayerna ur neḥyi ara imdanen. Yella lxiṛ, yella uxeddim. Deg m’ara nebdu tuẓda deg iweǧǧiben, ur d-nettniq ara alam tenṣef tefsewt. Ma d aseggas-a aṭas n tesyar ur n-ttelli ara tibbura-nsen-t. Tin yesɛa-n cwiṭ, ad twaliḍ deg wefrag-is kra n tcekkaṛin n uzemmur. Ula d ssuma n zzit ad taweḍ ɣer wanda ur tt-iqeṭṭeɛ ara wemdan. Ma tura, di tesyar, yettnuzu 700 idinaṛen i llitra, sya ɣer zdat ad tafeg ssuma-s», id d-yenna yiwen ufellaḥ yesɛa-n tissirt n uzemmur di tɣiwant n Tmizart, yettekki-n ɣer Wagennun. Imḍebṛen iqedcen deg weḥic n tfellaḥt gren tiɣṛi i yemdanen akken ad fken azal i tzemrin-nsen acku ula d astehzi-nsen yella deffir n wenqas n lɣella-agi n uzemmur. Llan kra n yemdanen ur rezzun ara ɣer wayla-nsen alama yebba uzemmur. Ayerna, mi bḍen ɣer din ad d- ṣṭebṭ ben iɛeqqayen s lemɣawla akken ad d-nejmaɛen s axxam. Isekla-agi (ces rabres) ḥwaǧen anqac d wezbaṛ.
T. Zenia