Mbaɛed mi yekfa wakud n uceyyaɛ n yisefra i d-yettwaɛeyynen i 26 n wayyur yezrin iɛeggalen n Tdukkla Tadelsant Adrar n Fad kkren i ufran n lḥeb seg ukerfa, d ufsar n wahil swayes ara ččaren kraḍ n wussan n tfaska n tmedyezt d tajmilt i Dda Lmulud n At Mɛemmer. Ma nuɣal-d ɣer umḍan n yimekkiyen (participants) iwekked-aneɣ-d Mass Yusef Zemmuri, aɛeggal urmid n tdukkla dakken iɛedda 120, « S leḥsab agedgan (exact) wwḍen-aneɣ-d yisefra n 129 d amedyaz gar-asen 20 d tameṭṭut, ara d-yerzun seg temnaḍin yemxalafen n tmurt n yimaziɣen, gar leqbayel s tuget, icawiyen, iznatiyen akked yicenwiyen, maca mi nmuqel akka d wakka iḥettem-aneɣ lḥal ad nḍegger ukuẓ seg-sen i yeffɣen akk seg usaḍuf n umsiẓwer, almi i d-qqimen 125». Ma yella d ahil ara yettwasmersen ussan n 27,28, d 29 seg meɣres iban-d belli yetturaǧu ad ilin 3 n yisaragen : yiwen ɣef tmedyezt n Zeddak Mulud yettwazewlen: Introduction à la poésie de ZEDEK Mouloud, sɣur Mass Sɛid Cemmax. Wis-sin s wazal-is daɣen, ad yesɛu d asentel tamedyezt taqburt akked tetrart : De la poésie kabyle ancienne à la poésie kabyle moderne, ara d-awin Massen Zahir MEKSEM akked Salim BENXLIFA. Ma yella d aneggaru Massa Malika Fatima BUXELLU ara aɣ-t-id-yawin s usentel n : l’anthropologie chez Mouloud Mammeri, une vocation tardive mais des prédispositions précoces.Annect-a ad yili deg annar war ma nettu ttiɛad n ccna sɣur terbaɛt n at tuɣac yesfan ara d-yasen seg Sedduk, akked tceqquft n umezgun i wid i iḥemmlen baba-s n tẓuriwin, rnu-as agala meqqren ara yeg unaẓur d inebgi n yiseɣ n teẓrigt-a tis-mraw-sin Zeddek Mulud, deg yiḍ n 28 meɣres deg taddart n uxxam n yilemẓiyen.
Mhenni Xalifi