Yal mi ara d-taweḍ tefsut,Leqbayel si zik-nsen ttmagaren-tt s lferḥ .Ass amezwaru n tefsut neγ ‘’ amenzu n rbiε ‘’d ass n tmeγra di akk tamiwin n tmurt.Tuget skaren deg-s imensi γef demma,llan daγen wid itteffγen d igrawen γer yigran akken ad ẓren agama zegzawen,yettwareqmen s yijeǧǧigen yefsan. Tama n At weγlis,am nettat am waṭas n yimukan di lǧiha n Summam,imezdaγ–is ttmagaren tafsut s ucγal n yimensi iwumi qqaren :’’ADERYIS’’.Aderyis,d isem n yiwet n teḥcict(thapsia garganica ) i d-yettemγayen di lexla.Imenza ḥekkun-d fell-as dakken deg-s dwa d waṭas n lmenfiεa i tezmert n bunadem.Γef waya,tteggen s yes-s imensi ideg ara ččen akk wat uxxam.Ladγa yal mi ara d-taweḍ taggara n furar,meḥsub di ddurt akk tamezwarut n wagur n meγres,ad tafeḍ imezdaγ akken ma llan ttḥerkilen wa deffir n wa akken ad sfuglen ‘’amenzu n rbiε ‘’.Wid izemmren,ttruḥun γer lexla,akken ad awin iẓuran n teḥcict-a i d-yettemγayen di lbur akked ikeḍran ;llan daγ wid i yesmenyafen ad tt-id-aγen di leswaq i d-iqerben,yecban ssuq n Sidi Σic. Tameddit n wass,tulawin yuγ–itent lḥal fetlent seksu,heyyant-d leḥwal yecban : lbaṭaṭa,llubya,ibawen akked lḥemmeẓ .Ad sfurent kullec γef tikelt deg useksut yersen γef teccuyt irekkmen,daxel-is iẓuran n uderyis akked tmellalin. Lawan n yimensi,ad d-nnejmaεen akk wat uxxam γer terbuyt yeččuren d ameqful ifuren s uderyis.Yal wa ad yaγ deg-s tiremt-is,ad yernu ad yečč ayen i t-id-isaḥen seg tmellalin. At zik,smenyafen dakken mi ara yečč yiwen imensi-nni,ur itess ara aman.Aya ttwessin fell-as,iwakken aderyis yellan d dwa,ad d-yeǧǧ seḥḥa deg wid akk i yeččan.S wakka ansay ad iεeddi di talwit d lisser akked tezmert. Ttiεad ar umenzu n tefsut ara d-yezzin.
Mokrane Chikhi