Ahaqel-it d 07sr:30 n tenzayt lexmis iɛeddan deg Xerraṭa, mi bdan yimnazzalen (athlètes) anejmuɛ akken ad heggin i ubdaw n tazzla seg tesnawit n Tẓeɛrurt. Taẓrigt tamenzut n uzgen n umaraṭun-a tessudes-itt-id Tdukkla Tanaddalt n Yijermunen s tallelt n yimḍebbren n tdayra n Xerraṭa, d tajmilt i urgaz Yeḥyawi Ɛebdeslam. « Azgen n umaraṭun-a d tajmilt i gma-tneɣ Ɛebdessalam Yeḥyawi i aɣ-yeǧǧan taggara-a kan, d yiwen n urgaz i yellan iḥemmel rnu yessebɣas aṭas ilemẓiyen ». I aɣ-d-yenna Zahir Heddaǧ, aselway n tdukkla-a tanaddalt. Tazzla-a i yettwabḍan d taggayin neɣ d iḥricen: ilemẓiyen n 18 akked wid n ddaw 29, wid n 30 lwaḥi ed wid n 40, taggayt n 41-51 iseggasen, akked tin n 51 sna d asawen. Amaraṭun-a yemmug d lexmis 08 mayu ilmend n wazemz amezray daɣen, anida dɣa nwala xilla n yirgazen n tsertit i as-iḥeḍren. « Ad snemreɣ lmir n Xerraṭa akked yimḍebbren n twilayt ɣef tallelt-nsen. Yeɛjeb-aneɣ lḥal merra seg teẓrigt-a tamezwart, iswi-nneɣ ad d-tettili yiwet mkul aseggas ». I d-yenna dima uselway n tdukkla. Azgen n umaraṭun-a yebda mettwal 09sr:00 n tsebḥit, ɣef 12sr:00 yella yekfa ufraq n warrazen i kraḍ n yimezwura n tal taggayt. Ad d-nesmekti dakken tekkan deg-s azal n 400 d anaddal seg temnaḍin yemgerraden n Bgayet d kra n twilayin i as-d-izzin.
Mhenni Xalifi