Ilmend n usmekti n wass aɣelnaw n unelmad ( 19 mayyu 1956) d usmekti n tedyanin n 19 mayyu 1981 aṭas n leqdic adelsan i yemmugen aseggas-a ama di temdint neɣ di tesdawit n Bgayet. Aqusis Ussnan Tumast n yinelmaden n tmaziɣt xedmen i teɣzi n sin n wussan s lemɛawna n Tesqamut n Tmeɣṛiwin n temdint n Bgayet, yiwet n tmesbanit meqqṛen umi semman: “ Tafaska Taɣelnawt n Unelmad “. Di tfaska-ya aṭas n leqdic i d-yellan, ama d timsizliyin ger trebbaɛ n umezgun n yinelmaden n tesdawit, neɣ daɣen ccna akked yisaragen ladɣa i d-fkan yimeɣnasen izeddin di tedyanin n 19 mayyu 1981 di temdint n Bgayet. I yeṭṭfen lwelha di tfaska-ya, d tajmilt i as-yuɣalen i mass Mohamed Adjal yellan d yiwen n unelmad aqdim n ugezdu n tmaziɣt n Bgayet, d aɛeggal daɣen deg uqusis ussnan Tumast. Ɣef wakken i d-xebbṛen yimḍebbṛen n uqusis Tumast, “ Iswi n tejmilt-a d asebɣes n kra n win i nwala, i nessen seg yinelmaden iɛeddan sya di tesdawit ǧǧan-d limaṛa deg wayen yeɛnan timuɣnest ladɣa ɣef yizerfan n unelmad akked tmaziɣt. Nefren aseggas-a mass Mohamed Adjal, imi netta d yiwen seg wid iqedcen aṭas deg uqusis ussnan Tumast. Ɣas ma ur yelli ara seg wid i d-yesbaneyen iman-nsen i medden, maca neɛlem dakken kra n tmesbanit yexdem uqusis-nneɣ deg yiseggasen iɛeddan yella deg-s, yeqdec deg-s mebla ɛeyyu”. Ma ɣef sebba n ufran-nsen i tikkelt tis snat anelmad n tmaziɣt, imi ilindi yakan aqusis Tumast yerra tajmilt i mass Zidane Yacine, netta daɣen yella d anelmad n tmaziɣt, daɣen seg yiɛeggalen iqdimen n uqusis Tumast, imḍebbṛen n uqusis-a nnan-aɣ-d : “ Nettwali asebɣes n yinelmaden n tmaziɣt d ayen ara yesfeṛḥen akk medden, acku d ccan n tmetti i nessuli neɣ i nerfed, d tamagit-is umi nefka ccan. Rnu ɣef waya, di teswiɛt-a d aqusis Tumast i iqeddcen iman-is di tesdawit akken ad temmag tfaska-ya, meɛlum iɛeggalen-nneɣ mi ara d-yaweḍ umeslay ɣef anwa umi ara nerr tajmilt, ad d-ssummren wid ssnen ama s leqdic ama s timuɣnest. Neẓṛa dakken iɛeggalen iqdimen n uqusis Tumast aṭas i nɛettaben, di lḥaqiqa uklalen meṛṛa tajmilt, yerna d ayen ara iceṛfen ama d tasdawit neɣ d timetti”. Ɣer yidis n tfaska n unelmad i d-isewjed uqusis Tumast, tiddukla n yinelmaden Act n wammas asdawan n Terga Uzemmur, texdem yiwet n tmeɣra meqqṛen ideg yecna ucennay n ṣṣenf atrar Mamu Benzayed. Inelmaden iḥedṛen i tmeɣra-ya, fuṛsen tagnit sɛeddan yiwet n ssehṛa igerrzen i sen-yeksen kra seg leɛtab n tɣuri d yikayaden. Ula di temdint n Bgayet, kra n yimeɣnasen n MCB, fuṛsen tagnit akken ad fken isem n “ Uɣalad n 19 deg mayyu 1981” i lkaṛeffur n Dawaǧi yellan di tlemmast n temdint. Seg tama-nniḍen, iɛeggalen n usqamu n twilayt ( A.P.W), nnejmaɛen ass n 19 di mayyu akken ad mmeslayen ɣef wayen icudden ɣer tmaziɣt ama di Bgayet neɣ di tmurt n Lezzayer. Iɛeggalen-a n l’ APW ɣef wakken i d-xebbṛen, wekden-d dakken aneṣṣeb n tmaziɣt di tmendawt d yiwet n tɣawsa ara yessiǧehden tadukli n uɣref azzayri, yerna daɣen aneṣṣeb-a s tmuɣli tanzerfant, ad d-yeglu s yisuḍaf ara iḥettmen ama i yimdanen neɣ i tuddsiwin asemres n tmaziɣt di yakk taɣulin n tudert.
Mokrane Chikhi