War ahat, gar isental i iceɣben s waṭas iɣermanen ( les citoyens) ed yibabaten n Ayt-Smaɛel, imi snuzgumen ɣef tneflit (développement) n taddart-nsen, d aɛeṭṭel i yewwi usenfar n uheggi n tesnawit i warrac . Ar tura, inelmaden n Ayt-Smaɛel, i d-yezgan deg tdayra n Yiderginen ttaɣen azal n 15 n yikilumiṭren akken ad awḍen tisnawiyin n Tsexriwt, Iderginen, ed Xerraṭa anda ɣɣaren yakan. « Nesḥassef imi taluft n tesnawit-a tuɣal teḥma s wawal ed ufqaɛ. Ibabaten ẓran acḥal i yeswa lebni-a amaynut ara yettekkin deg usenqes seg txessart n tɣuri ɣur warrac ɣef sebba n tebɛed, ihi ad yessali aswir amatu, imi ass-nni ibabaten zemren ad ḍefren igemmaḍ n tarwa-nsen s teqreb, maca daɣen, ad d-ddun i yidis-nsen akken ad nqabel d abrid amihi (danger) i yettḥazen timetti-nneɣ taggara-a ladɣa ». Ay d-yenna Sadeq Rebbaɛi, anmazul n uselway n tɣiwant. Ad nesmekti dakken imezdaɣ llan ttraǧun seg yilindi taldayt n tesnawit maca ur d-yelli waya.
« Nnig n wassaɣen (les rapports ) i tga tdayra, SUC, imḍebbren n tɣiwant, akked yikuran (sonnette d’alarme) i yettwaɛeyynen aseggas d uzgen tura ɣer deffir mi yettwasbedd ubiru amaynut n tɣiwant, maca aɛeṭṭel deg uselḥu n lecɣal yeggelgel fell-asen almi ur nezmir ad d-nessefhem d acu i iḍerrun. Yella daɣen wugur n termisin (entreprises) imi ar tura ur nufa tid yesɛan ttawilat, i izemren ad ṭṭfent asenfar akken iwulem, ad t-fakkent deg wakud ɣef nestenyiw deg ugatu (contrat). Lḥasul aɛeṭṭel-a, ed tuqin (manque) n yixeddamen, akked wallalen angawen (matériels) berqqen deg umḍiq-nni almi i d-ttbinen ɛinani. Maca ɣas annect-a d uguren nemlal-iten-id, tamadirt (la tutelle) mazal tesɛuẓẓug i tiɣriwin-nneɣ. Rnu i waya, aɣilif agaɛmir n usečči s tzarurt (trisiti) ɣas ma tella yiwet n tezrawt n usiweḍ seg umḍiq deg Tizwal i yewwi-d ad teṭṭef DLEP ». I isemmed win i aɣ-d-yettmeslayen send ad ikemmel : « ilaq asmekti dakken amiru (la promesse) i aɣ-d-yefka lwali n Bgayet ed ucqirrew i yerfed akked yinemhalen n DLEP ed termisin i terza taluft n leqdic-a ass n tirza n 18 seg meɣres 2013, belli tasnawit ad yeldi kra seg-s xersum i Cutember, maca ass-a iɛedda ugar n useggas ulac acu i d-yellan, d iɣilifen-n i mazal reglen-aɣ abrid. Ɣef waya qqareɣ dakken ifat-aneɣ lḥal s xilla. Ihi acqirrew-a ar tura d awal kan ». Axxam n tɣiwant, imezdaɣ, tidukkliwin akked yibabaten n yinelmaden ttmesteqsayen s war asirem ɣef teldayt n usenfar-a, ma neẓra dakken sey-a ar sdat iqerben, tasnawit n Tsexriwt ur tettqiddi ara seg tama n yimeḍqan ladɣa, akken ad tesdari inelmaden n tɣiwant n Tsexriwt, ihi amek ara teḍru ed wid n Ayt-Smaɛel ?.
Mhenni Xalifi