Tidet nniḍen n internet !

Partager

8 n tasinin (secondes) d ddeqs i tnegga tamarikant n umel (NSA) iwakken ad terwi aselkim-ik (ordinateur), aya iqarr-it-id Edward Snowden, yettusemma tanegga-a tesseqdec s tehri yiwen n wahil amalwayer (programme malware) arurad maḍi akken ad tessettwaɣ imelyan n yiselkimen ad tekkes seg-sen isefka (données). Seld tadyant n yifayluyen-a i d-yettwaberrḥen sɣur Edward Snowden, taluft-a ad ternu ugar n ccek deg wulawen n yiseqdacen ɣef wacu akka ay tettag s tidet NSA, anwa ara aɣ-d-yernun tafat ad negzu?. Ɣef leḥsab n wayen i d-yettwasersen taggara-a, deg wayyur n meɣres 2014, deg usmel aliktrunan Intercept, i d-yesnulfa uneɣmas aqbur deg Guardian Glenn Greenwald, NSA tessegma-d, thegga-d yakan iseɣẓanen (logiciels) diri-ten, tesseqdac-iten deg umaḍal merra bac ad tesɣendef (ad teppirati) isefka n waṭas ed waṭas d aselkim. 

Seg kra n tamiwin, NSA tesseqdec tiqeffet n Faysbuk (Facebook) akken ad tɛus aselkim i as-yehwan, ad tekcem i daxel n yikaramen (dossiers). Seg tamiwin nniḍen, tceyyaɛ iznilen (e-mails) ed yiznan ur nwata (spams) i yettawin amalwayer-a. Tanegga ad tili ihi ahat teẓẓa aseɣẓan-a axabit deg yimelyan n yiselkimen, d ayen ara tt-yeǧǧen ad teskef seg-sen ineɣmisen ula seg uẓeṭṭa n tilifun ed internet ɣer lberrani. Meḥsub aseɣẓan-a izemmer ad yettwasbed deg ṭam (8) n tasinin xersum mačči s tuqqna am tayla-nneɣ, yemmug akken ad yessekles ameslay seg umikru n uselkim, neɣ ad yeg tiwlafin seg tkamira (webcam).

Qqaren-as Turbine : d yiwen n unagraw (système) wissiɛen. Aseɣẓan-a yella seg useggas n 2004 maca aseqdec-ines deg umaḍal merra yettban-d dakken yebda kan deg useggas 2010. Amalwayer-a, yennulfa-d tazwara i kra n yiswan, i kra n nnicanat anida taywalt (communication) ur tezmir ad tili tettwaɛus s wallalen iqburen, yella yettwaseqdec i wayen yerzan kan  tamguri (industrie) , dima ɣef leḥsab n wayen i d-ibanen deg yifayluyen i d-yefser Intercept. D imelyan n yiselkimen ay ttwaḥuzan, unfen ihi i NSA ad teccelqef seg-sen isefka n yiẓeḍwan isawlanen akked Internet i berra. Amgar-a awurman (automatique) n yisefka – i yesɛan isem n wangal Turbine – yemmug seg umḍiq NSA kit, deg Maryland, maca ula deg Tgelda Yeddukklen ed Tjapent. Tanegga tabriṭanit n tɛessast GCHQ, ad tili turar ula d nettat nnuba s wazal-is deg tsekraf-a. Mi yettwasteqsa yiwen n umassay (responsable) n NSA sɣur AFP, yeɛreḍ ad d-yesmekti belli timhalin-a (opérations) llant ttwaḍebbrent « ḥaca i yiswi n uḥareb mgal n tɣallit ama n daxel neɣ n berra, i tedwilin tiɣelnawin neɣ tineɣlafanin, ur yelli i kra nniḍen ». 

Taluft-a aredmani, ad teqqim tesulles, yelha kan win yettḥezziben, yettɛessan iman-is deg yal aẓeṭṭa inmetti, neɣ ad d-nini yal mara yesdaffel tawwurt n internet.

Mhenni Xalifi

Partager