Deg yiwet n tdiwennit i d-yeffɣen deg isebtar n tmaziɣ “Tiɣremt” n La Cité yemmeslay-d Zeddek Mouloud ɣef waṭas n tlufa i t-yerzan netta, i yerzan tazwawt akked yisental wiyaḍ. Deg uḍris-a nuɣal-d s ugezzul agejdan n tdiwennit akked kra n yisegziyen daɣen.
Yessarem ad yecnu deg Ayt-Smaɛel, maca…
D inebgi n yiseɣ n teẓrigt tis-mraw-sin n tfaska n tmedyezt tamaziɣt, d tajmilt i Dda Lmulud n At Mɛemmer deg meɣres yezrin. Tidukkla Tadelsant Adrar n Fad tella tessawel i unaẓur, yeqbel s tumert ad d-yeddu. Dɣa yella yetturaǧu ad yeg tameɣra tagaɛmirt deg wass wis-sin n ttiɛad maca ur d-teḍra ara, ɣef ayen-nni yenna-d Zeddek dakken ur yelli wamek, ad d-tili ur tesɛa ara anamek lemmer i tt-nexdim, acku akken ẓran wid iḥeḍren i tfaska, yemmut yiwen n umeɣnas, d aɛeggal deg Tidukkla, Mass Ɛebdun, talwit i yiẓiɣer-is. Maca Zeddek Mulud iwekked-d belli ad ilint tuɣalin ɣer Ayt-Smaɛel yal mara d-terzu tegnit.
Ɣef wawal-is, segmi yebda
ccna yeqqim kan d netta.
Nesteqsa win ukud nettmeslay ɣef wamek yeqqar mara imuqel i umecwar-is i yebdan deg useggas n 1983 ed wayen i d-yewwi i tezlit tazwawt, Zeddek Mulud yesmekta-d tazwara dakken mi d-yekcem ɣer tezlit aṭas i t-id-ijebden; ama d leḥmala n uẓawan neɣ d taqbaylit. Dɣa, ɣas ḥawla n yiɛewwiqen ay d-imuger imir-n maca ur yebra i ṭṭbel deg waman. D ayen i t-yeǧǧan, dima ɛlaḥsab n wayen i d-yenna, yeqqim d netta ɣef wayen yerzan taqbaylit, seg yiseggasen n tmanyin ar tura, yeḍfer amennuɣ ɣef teqbaylit, meḥsub ur ibeddel ara acku netta ur yezmir ad ibeddel ɣef teqbaylit, yessegza-d dakken d netta i igan akken. ɣur-s ma walan-t-id wiyaḍ yessenfel, d nutni i bedlen mačči d netta. Ma yella d aqennaɛ, yenna-d belli yettuqennaɛ s wayen ixeddem ar tura, ladɣa mara iwali mmi-s n Adem ɣer tẓuri tamirant ed wanda i d-teggra.
Amawal atrar yesɛa ɣ
ur-s aṭas n wazal.
Dima deg urebbi n tdiwennit, nejbed-d awal akked unaẓur-nneɣ ɣef wawalen imaynuten (néologismes) i yesseqdac deg tezlatin-is ladɣa seg 2000 err-d i da, win terza temsalt iẓerr annect-a d ayen ilaqen tura, acku taqbaylit tesra-asen akken ad taẓ ɣer sdat, ad timɣur. Azal n wannect-a d asnerni n tutlayt. Netta ur yelli ed win yebɣan ad teqqim teqbaylit akken tt-id-ǧǧan lejdud, meẓẓiyet. ɣur-s, ilaq ad teddu ed wakud-is. D ayen i t-yeǧǧan yesnulfay-d ula d netta awalen mara t-iḥettem lḥal, amedya am wawal « tagerma » i (l’idolâtrie), awal-a yeṭṭef-d aẓar-is seg wawal « agerram » i yettnemmiken ɣur-sen amɣar ameqqran amussnaw.
Ameslay ɣef uḍebsi
aneggaru « D abrid kan ».
Mi nesteqsa Zeddek Mulud ɣef uḍebsi i d-yeffɣen deg 2012, ed ɣef wamek i t-imuger uzayez (public), Bab n taɣect yessendahen iwekked-d dakken yelḥa ahat ugar n « Liḥala n tmurt ». Tizlit i yefka d azwel n yiseɣrez (album) d tajmilt i Tmurt n Yezwawen, daɣen i yal argaz i d-yefkan kra i yedles amaziɣ, acku akken i d-yenna, ilaq ad nili nestaɛrif s wayen yexdem yiwen, win i d-igan kra ad t-id-nebder s yisem war tuffra, imi win yuklalen yuklal.
Amaynut-is i wayyuren-a
sdat-neɣ.
Tikkelt-a mačči 4 neɣ 5 n yiseggasen ara yerǧu akken ad d-yessufeɣ, seg yiseɣrez « D abrid kan » n 2012, Zeddek Mulud qrib yekfa imir-a asekles n uḍebsi amaynut, ɣef usiḍen n wayen i d-yenna, daɣen ma lḥant teswiɛin akken i tent-yessarem, ad yili umaynut deg leswaq, deg ɣuct-a i d-iteddun. Aḍebsi yella-d deg-s ala ajdid, ad ilint deg-s 14 n tezlatin, anda 3 seg-s llant yakan deg internet.
Yesḥassef ɣef taluft n unafag…
Lawan-nni yella deg Fransa mi i as-d-ssawlen akken ad yettekki deg tfaska n ccna amaziɣ i yemuggen deg wayyur n duǧember yezrin deg Tamenrast, Zedek Mulud yenna-d dakken yeqbel, rnu iga-d inig seg Fransa ɣer Tmurt ilmend n waya gedgeg. Ihegga iman-is akken ilaq, yeǧǧa lecɣal-is, maca taggara ur yerza ɣer yimuhaɣ deg uneẓruf ɣef sebba n tulacit n umkan deg tmesrafagt. Annect-a yesḥassef seg-s aṭas, imi ɣur-s ur ilaq ara akk ad d-yili wugur am wa, daymi yessaram ur yettuɣal ad yeḍru.
Taggara iceyyaɛ tiɣri i
tsuta tamaynut
Mi d-nebder ilemẓiyen ed wacu izemmer ad asen-yini, bab n 30 n yiseggasen ar tura netta deg usayes (scène) n ccna, yenwa seg wul ad iwessi inaẓuren ilemẓiyen akken ad qadren taqbaylit xersum, rnu akken yebɣu yili, yebɣa ayen yettwasbedden ur yettwahudday ara.
Mhenni Xalifi