“Abruy deg umezruy’’ d yiwen usaru n ṣsenf n ufetray (documentaire) i d-ttheggin Naima RAMDANI akked Youcef AMRANE i yettwasnen deg unnar-agi n sinima. Yebda leqdic, i tikkelt tamezwarut, s wudem unṣib ass-nni n ssebt iεeddan anda ḥedren akk wid ara yuraren deg usaru-a. ‘’Abruy deg umezruy’’ d awal ara d-awin inigan n tegrawla n 1954 γef tedyanin i d-yufraren deg tallit-nni, d ccfawat γef leḥris ay ddren di lweqt-nni d wamek qublen taswiεt s yiseγ d tissas. Akka, dγa, i d-yella ciṭ n usmekti sγur kra n yimjuhad imḍebbren di lgirra-nni. Ma γef yiswiyen n usaru, tenna-d Naĭma Ramdani : ‘’aṭas n tedyanin timeqqranin n lgirra-nni ur nettwassen ara di tmurt n leqbayel. Ihi, leqdaci-agi, ad yili d asekfel n wayen regglen wussan, ad yeqqim d amezruy i tsuta ara d-yasen.’’ Ula d Youcef Ramdani, yenna-d :’’leqdic-a, d anadi deg umezruy, yesenṭeq-d inigan n yiwet n tallit qessiḥen. Asaru-nne&gamma,; d aseḥbiber γef ccfawat n yimjuhad uqbel ad tent-tali tatut, uqbel ad negrent.’’ Nessaram teγzi n leεmer i yimjuhad i d-yeggran d wafud igerrzen i wid akk yekkan deg usaru-a, mebla ma nettu Younes Zidane i asen-yefkan afus n tallelt deg uheggi n temlilit-a.
Hocine.M