D asefru ula d tullizt
Aḥulfu, d tiɣremt n yifyar
Amdan mačči d tabalizt
D llsas duru, i wmelyar
Taqbaylit d weltma-s n tleglizt
Tibuxsit nugg-itt, d lɛar
Azal n wul d azamul
Tafarka d isem n tefriqt
Tisist am uẓeṭṭa d lemtul
Awal ɣurneɣ yif tawriqt
Aḥnat d ddkir, laɛnayet teggul
Tudert azal-is d tadqiqt
W’ur nuklal amkan, deg umanag
Leqder d ccerṭ n unezzah
Miḥlal n umraḥ, yeffer afrag
Aɛrḍi d ḥḥarb n ccah
Ticcewt am ubeqqa umayag
Icmet yir ufus ah ah ah ah !
Ma yeɣli-d fell-ak uḥru
Neɣ teɣliḍ s ufell-a uḥru
Siwa ma leggaɣeḍ, ccwi!
Yir tiṭ zzarb-is d Illu
Balak! astehzi s mummu
Wamma iddew, gma-s d ibki
EBOSSE n uzezzu n tizi
D ajeǧǧig, yefsa deg ufus
Nettu tidi si lḥenni
D acu akka ur nexdim, ma drus
Nekkes aḍar i tsebbalt-nni
Negla s uzemmur d lqus
Tinzar, d tidet n ssenǧaq
Tamurt teḥmel ddunit
Lldi ccqayeq uwwur n ṭṭaq
Imsarri uxxam s win d tin
Numen ula d iḍ ad d-icraq
Neɣ anda-t yiswi n tiltin !?
Tajaddit, netta-t d arraz
Iseɣ usafu d tanagit
Talwit d sser uqeffaz
Tewzen talast n tallit
Nneyya turew-d argaz
S tilawt tecbaḥ targit.
MSEDRAR