Nedder neṣṣaweḍ ɣer tagnit am ta !

Partager

Ulac  acu yesefcalen amdan  am  ticki ara iẓer s wallen-is  kra yezrɛa , kra yenwa ad yemɣi yeffeɣ d rrayaɛ.  Ulac acu yesedhacen allen am  ticki ara wallint  akal ( deg nwant anṣib)  ara yuɣal d lbur. Ulac acu yeseḥzanen ulawen am  yiger mi ara teɛamer yir lɛecba .« Iṣṣub yiswir di kulci, am win yeɣran am win ur neɣri, tikwal win ur neɣri  axir-is » is yenna umedyaz  deg awal-is. Nedder alarmi  neṣṣaweḍ ɣer tagnit am ta : nettraǧǧu dge ubudu lexrif ! Maca ahdum ur yeqqim ara kan din, imi  anect-a n ɣelluy akked ugrireb ,  di tagnit n wass-a,  ttbanan  am akken d nitni  i d leqrar, am akken d nitni i d ṣṣwab. Yulli usenjaq n timurṣad nnig iqera , zedwen wallaɣen ddew  ubehri-ines. Ass-a gtent tilibizyuwat. Wid  yestufen nnan lḥemdulah ma d wid iwallen ttneẓman ur d uffin anwa abrid ara aɣen. Tidet  mačči d yiwet neɣ snat n tilibizyuwat  id yenernan s annar n umṣṣawaḍ( communication). Limer d lebɣi-k ay ul tili aqlaɣ d imerkantiyen  n tmsusni akked yidles .  Maca gar ṭmaɛ d wayen yellan ayen din d- igejduren , ayen din n texnanasin.  Xas akken gten wallalen n umṣawaḍ  , ayen s-  id glant( di tillawt)  yecba aɣuru. Gar imaṭafen n ENTV d wid  n index télé El Ajwa, KBC, El Watan TV , EL Nahar TV , El Chourouk TV, El Hoggar, El djazayriya, Dzayer TV ulac amgired .  Yiwet cetla nsent ; yiwen  udem nsent  , yiwet n tlaba-nsent , yiwen uxaṭṭar deg-sent . Ayen yellan d ahil deg imaṭafen-agi  ur d yewwi amgired ɣef ayen akken nennum nettwalit  zikk-nni asmi iɣ teqqen  tmara ɣer yiwen wahil n l’ENTV. Mi ara nwali acu id yettɛaddayen ɣef yigdilen ( les écrans) n tilibizyuwat-agi id yenulfan neqqar men ttif asmi akken tella kan RTA weḥdes deg annar wala anect-a .Lɛib mi ara yefti ma ur yestewḥac yesewham !  Meqqar di lwan-nni( zzman n RTA)  llan nnuba-t yesɛan iswir akked azal am  nnuba n Ahmed Bejaoui «  ciné-club » . Meqqar di lwan-nni tagnit ɣer tayeḍ ttilin isura yuklalen tamuɣli. Meqqar di lawan-nni  ttikwal yettili leɣlaḍ teɛaddayen-d  t inaẓuren at iseɣ akked lḥerma am Cherif kheddam, Noura, Taleb Tahar, Idir, Imaziɣen Imoula, Meksa Abdelkader…wama  ass-a ala  timeskaɛrar ɣef acu dellun-t wallen. Yella deg awal : acu ara d yerrew yilem mu mačči d nger ! Nedder neṣṣaweḍ ɣer tagnit  am t-a, anda  d ifarḥen i iɛamren reḥba deg abdil n iḍabalen. Nedder neṣṣaweḍ ɣer tagnit am ta, anda asfujeɣ yuɣal d lmeɛna. Nedder neṣṣaweḍ ɣer tagnit am ta, anda tizelgi tuɣal d lewqama. I wumi ayen-nni n tilibizyuwat ma yella i wakken  kan a nẓer nnuba-t yeskeɛriren yis-nneɣ , issura yetahayen yis-nneɣ acku wid isen yellan di lmendad ijeɛlaen  agdud d-aɛaggu n  ur yessin ara ad imeyezz  gar ayen yellan d taẓuri d wayen yellan d ilellucen ? Neṣṣaweḍ ɣer tagnit am ta anda  gugmen yimusnawen d ccix Chemsou ( deg el nahar tv)  iwumi i tettunefk tagnit akken ad yesmir  tiɛugent-is akked asthref-ines ɣer yirwanen l lqum ur neɛrif ? Ass-a d ccix Chemsou d timilat-is i  yuɣalen d itran deg  ttṛaǧǧunt medden  ad gemrent tamusni. Iṣṣub yiswir di kulci… ahat awal-agi  drus imi tidet kan ur d yegri yisewir di kulci ! Nedder armi nekseb tuget n wallalen n umṣawaḍ( communication)  ama s  wudem n tira ( iɣmisen) ama s wudem n temena( radyu, telibizyun, intenet) …mača nekni mačči am medden… nekni mi akken i tlaq tguni nettnekkar, mi akken i tlaq tnekra neggan.. dɣa werǧin nelli d lwaqt, werǧin yesneɣ lwaqt. Tuget n yeɣmisen yellan( id  ttefɣen ɣer leswaq )  qrib ur d tettefeḍ ara deg-sen aḍris imeɛnan i tɣuri . Tuget deg aɣmisen-agi ur ttnuzzun ara. Ula d iɣmisen n waddal yugardeg-sen  regamat  akked uqacem wala ameyyze d usenqad imeɛnan . Radyuwat  yellan  am yiḍ am uzal d ccnawi  n ṛṛay umu d ttbexirent( ula d tagi n Ṣṣuman neɣ Tizi Wezzu kif kif). Wama  tilibizyuwat ula id nnini, imi  gar isura n Ṭurk ( ur n ccud ur neqqin ) akked tiqulhatin id sufuɣen wigi nneɣ i tezzi leɛqal . Ahil-nsent  si tṣebḥit ɣer tameddit ala amɛuqqu id yettawi. Tidet, nedder armi nerra tacmet d tahuski, armi nerra lɛib d-iseɣ, armi nerra iṣuɣan d awal, isusfan d aman, tiyita d aseḥlleli. Iṣṣub yiswir di kulci … neɣ ɛad ur d yeqqim yiswir di kulci ! Settin isaggasen menbeɛd amenzu  n Unbir… mazal-aɣ netteṭṭed deg yir yiffan . Mazal nenwa rṣeḍ d ayefki, mazal nenwa ijdi d aman aɣ yeksen fad, mazal nummen ad yerew ubud lexrif . Neseblaɛ  deg taḥbubin mebla acetki  armi ur neẓri ma d tučda neɣ d ackunṭed i d deɛwessu. Asmi gzin medden inumak n wawal qqaren : «  Ddwa sɣur yir amdan am halajɣar ineq,  halajɣar sɣur amdan yelhan am ddwa ḥellu iɛtaq ». Akkin leǧnas d amḥizwer amek ara d yefrir yisem-nsen,  ad rnun tiḥajurin-nsen ɣer lebni n tɣerma talsawit. Ma d  dagi ɣer-nneɣ mazal n tezzi ɣef iɣulad yagrarben amer seg-sen ad nekkes aẓru i yir lebni id nektal mebɣir lebɣi. Yetnewa lxaêer mi ara d yendekwal wa ad yaff menbeɛd  3000 n isaggasen n tillin ɣef akal –agi, iseɣ-nneɣ yedda   d- iḍuman ddew taɣectu-tt  n timurṣad i yerran gar ifassen-nneɣ ṣalaḥ n lbiruwat. Imi lewliya hujren lemqam anwa tebɣam ad yezdeɣ lemqam ?  Imi lewliya hujren lemqam, amek tebɣam deg lemqam ad hadren lewqam ?  Imi d- izan i tezzin ɣef yiǧeǧǧigen amek tebɣam ad tifrir tamemt ?  Imi id neṣṣaweḍ ɣer tagnit am ta ,  annef i yifeṭiwej aɣ-yesmundel  iwakken anda tella tafat a ttenxayel !

Ait Slimane Hamid

Partager