Seg yilemẓiyen i d-yeffɣen seg tesdawit s ugerdas (diplôme) deg yifassen, drus maḍi umi d-tsaḥ tegnit ufan amahil deg walbaɛḍ n yimeḍqan. Amur nniḍen akk, ma d tiqcicin atentan ttwanasent axxam, ma d iqcicen rwan iɣimi deg leqhawi. Tuffɣa seg tesdawit mbaɛd ugar n 15 n yiseggasen d taɣuri, ur telli ara akken i tt-yessaram unelmad tazwara. Ad iɣil ad d-yawi kan turagt (licence) neɣ d majister, ad yaf dindin aqeddic. Netta taggara, ma d-yaweḍ ɣer uswir-nni ad yesres agerdas-is bac ad t-tɣum takka deg uxxam. Wis d sin n yiseggasen, tlala neɣ rebɛa akken ad yaf lxedma. Am umsiẓwer n uselmed i d-yellan deg wayyur n yulyu iɛeddan, 13710 n yimyizewren i yesɛaddan seg Bgayet, ala i 356 n yimukan kan. «Yewɛer aṭas akken ad trebḥeḍ amsiẓwer n uselmed, deg-s zzher, deg-s tamussni, ed waṭas n tɣawsiwin nniḍen. Ɣef waya, llan wid i yettɛemmiden ad sɛeddin berra i twilayt-nsen ɣas ad beɛden». Ay d-tenna yiwet n tesdawant. Rnu i waya daɣen, aɣilif n yinelmaden-a yerza ula d tadamsa-nsen n yal ass, acku ma yella ttuɣ ttawin-d taggazt-nni takraḍyurt (bourse trimestrielle) mara kfun taɣuri ad tekfu yid-s.
