Tuddar n tmurt n leqbayel ččurent d amezruy « yettuneṭlen »! Yal taddart, yal lɛerc yesɛa amezruy ur n ttwassen ar ass-a ! Yuɣ lḥal, imezwura nneɣ ur ɣrin ara, ur ttarun ara, ayagi yeǧǧa amezruy n tuddar ur yettwassen ara. Ɣas akken ɛerḍen aṭaṣ n yimarayen ad arun, maca ur d-ḥudden ara akk tilas. Aṭaṣ n wudmawen n umezruy ur ttwassenen ara ar ass-a. Imi zik nni, s wawal, neɣ s yiles kan i ttaǧan lejdud ayen yeḍran deg yizri, ayagi yegla-d s « lxurafat », lakked d tikerkas. Maca, tella tidett deg wayen i d ḥkan. Akka ihi, nessaqsa kra n yimɣaren n At Manṣur ɣef amezruy n lɛarc nsen. Snen laṣel n twaculin n tama-agi, lakked d kra n wayen yeḍran zik nni. D acu kan, ḥkan-aɣ-d yiwet n teqṣiṭ ɣef yizem aneggaru yedren deg wakal n lɛarc n’At Manṣur. Ɣef akken i snen, izem aneggaru yedren deg tama-agi yettwaṭef deg seggas n 1890. Ḥkan-d belli « d yiwen n umezdaɣ, isem-is Ḥamadac Muḥand Ameẓyan, yuli deg tagrest n useggas n 1890 ar wedrar n Zeggan yessan d-adfel. Yufa-d yiwen yizem amecṭuḥ. Amek ar as yexdem? yessaxdem allaɣ-is akk d tezmart-is akken ad yeṭṭef izem-agi amecṭuḥ. Dayen yessiweḍ ad yexdem, yuɣ lḥal ilemẓi-agi yeqwa dayen kan. As mi it yeṭṭef yewwit ar taddart, anda nɛaǧaben medden ɣef ayagi. Izem-agi, aneggaru n lɛarc n’At Manṣur yefka-t d lahdiya ilemẓi-agi i lḥakem n Fransa zik nni. Wagi yefka-t i tamazirt n yiɣersiwen (Jardin zoologique d’Alger de l’époque) ». Wagi d yiwen umedya kan ɣef umezruy n laɛrac lakked ttuddar n tmurt n leqbayel yettwattu-n. Aṭaṣ n tɣawsiwin mazal ur d ffiɣen-t ara ar wananr akken aten issinen medden. Yal taddart tesɛa maezruy-is meqren. D-acu kan ilaq-aɣ an ɣiz deg tamektayt n lɛama (mémoire collective), akken ad neǧbed ayen yettwafren fella-neɣ !
Syphax.Y