Kra n wakud segmi i d-ukiɣ, ẓriɣ tafiremlit-iw teteddu-d akked yiwen n urgaz ɣef udem-is axeẓẓir, i ur nelsa ara tabanta tamellalt, daɣen akken i d-yettban, yerra dderk ɣef yiman-is send ad iyi-d-iḍes. Yella yeṭṭef deg ufus azmam akked umru.
— Amek isem-ik? I yi-d-yesteqsa.
Lliɣ ur nwiɣ ara ad as-rreɣ, la berrneɣ tamuɣli-w ɣur tfiremlit amzum ggareɣ-as laɛnaya bac ad tesuffeɣ argaz-nni. Maca teṭṭef-iyi-d seg ufus bac ad iyi-teshedden, tenna-yi-d ilaq fell-i ad as-rreɣ.
— Amek isem-ik? Ay d-yules daɣen urgaz mebla aqesser tikkelt-a.
Lliɣ nhewwaleɣ daxel-iw acku ur cfiɣ ara akk fell-as. Taggara dayen nniɣ-as-t. Argaz-nni Yekla cwiṭ akkenni, yettraǧu kra n usegzi i ilaqen. ḥulfaɣ yesseḍsay cwiṭ waddad-iw, maca lliɣ ur sɛiɣ acemma ad t-id-rnuɣ.
Tafiremlit-iw s timmad-is tzeyyer isebliwen-s.
— Aredmani, ay d-yenna urgaz. Ur yelli wamek.
Rriɣ-as dakken ur cfiɣ ɣef kra, belli ukiɣ-d kan d awkay, am deg wass amenzu n tudert-iw, deg tesga tennexrab akk d abrid, ed daɣen aṭas ay lḥiɣ send ad iliɣ da.
Ihuz ddeqs n teswiɛt aqerruy-is.
— Deg lḥala am ta, ur tezmireḍ ad teqqimeḍ da.
Ssutreɣ deg-s ad iɛiwed asiḍen. Amek seg tama ttwaqebleɣ deg sbiṭar-a awerdan akken ad afeɣ iman-iw, tura ttwaḥerseɣ ad ttwatelfeɣ seg-s.
— Ilaq ad ẓreɣ amek isem-ik, i wanda tmaleḍ akked teɣlent-ik (nationalité). D ayen ilaqen.
Sdat uttḥeyyer, tafiremlit teẓuɣɣer argaz ɣer tama nniḍen akken ad d-tawi yid-s ameslay s taɣect taḥedrant, maca icaḍ din wawal. Argaz-nni yeṭṭef deg wawal-is, taqcict tettkettir aɛiwed. Taggara, win yettawin akken azmam yeggug akkin netta yesrugmut, mačči war ma ixẓer-iyi-d s tmuɣli taneggarut ur temɛin xilla. Dinna ay gziɣ belli yella yefqaɛ aṭas imi acemma ur yessaweḍ ad t-ijerred deg uzmam-ines. Maca nekk lliɣ ur zmireɣ ad t-alleleɣ. Tafiremlit-iw tuɣal-d i ɣur-i, azmummeg deg yicenfiren-is.
— Ur yelli d amdan n diri, I yi-d-tenna. Wanag ilaq ad yeg amahil-is. Aṭas n yimahiyen imeqqanen i yeṭṭafaren tadarit-a, yewwi-d fell-aneɣ ad nili dima nfaq.
Snuzgumeɣ ɣef wayen yezmer ad yeg urgaz-nni sey-a ɣer sdat. Tesbens-iyi tfiremlit. Briɣ I tfekka-w ihi, ad heggiɣ iman-iw ad uɣaleɣ i naddam.
Dɣa terna-d : “Tura ad ak-nernu ciṭṭuḥ n yidammen. Aql-it tfecleḍ ḥawla, segmi tnezfeḍ tesruḥeḍ aṭas seg-sen. Zmummgeɣ war ma rriɣ.
Yerra-tt-id ɣer tezwawt:
Mhenni Xalifi