Ass n larebɛa yezrin, sdis n yimezdaγ n tγiwant n Beclul, usan-d γer uxxam n Tnezzayt i wakken ad d-beggnen lγid-nsen imi ur ten-id-saḥen ara yixxamen yettwaferqen deg ssenf n LPA.
I wakken ad ssiwden tiγri-nsen n lγid i tγiwant, imdanen-a, beggnen-d reffu-nsen s tγimit i laẓ rrif n uxxam-a n ddayra anda i d-usan γur-sen ddeqs n yimdanen. Mi nerza γur-sen, nufan-ten-in deg umkan i wakken ad aγ-d-inin : « Ayen i aγ-yessawḍen γer liḥala yecban ta, d ɛeggu seg tazliwin seg tnedbalt γer tayeḍ. » Dγa d Allawa.B, win meqqren gar-asen deg leɛmer i d-yennan : « Ssutreγ axxam am nekk am wiyiḍ deg useggas n 1990. Asmi idul uqnaq, ɛawdeγ asuter deg ssenf n LPA deg useggas n 2013. Tura akka, ffγeγ-tent yakk, ur wwiγ s lemɛawna n ddula, ur wwiγ s yidrimen-iw. D aya iyi-yessawḍen ad qqimeγ i laẓ, i yiṭij, ahat tiγri-w ad taweḍ γer wid i terza taluft». I wakken ad d-nawi isallen seg yal tama, nessaweḍ ad nemmeslay d yimḍebber n ddayra n Beclul i aγ-d-yennan : « Ttwabnan 50 n yixxamen deg ssenf n LPA dagi deg tγiwant, anda i d-yella usuter sγur 174 n yimezdaγ. Tasqamut n ddayra tefren 50 seg wid yuklalen ad ilin seg yimezwura. Uqbel ad d-yaweḍ ttiɛad n ufraq-nsen, yennulfa-d d akken 10 ur ilaq ara ad ilin imi yettwabeggen-d belli sfaydan yakan deg yiḥricen –nniḍen. Dγa, 40 ttwaferqen, qqimen-d 10 i yellan akka tura deg ubrid n unadi n liḥala n wid ara d-yalin seg 124 n yimdanen i d-yeqqimen ». Ɣef wayen yerzan awal yuzzlen, d akken 10 n yixxamen-a, yuγ lḥal ttunefken i yimdanen ur nelli ara d arraw n tγiwant. Mass Ait Ali yenna-d : « Ad ssutreγ seg wigi i d-yeqqaren belli ttwaferqen yixxamen-a deg tuffra, ad iyi-d-awin ismawen n wid i d-saḥen. Ad d-iniγ s wudem unṣib belli ixxamen-a, ur ten-yewwi ula d yiwen akka tura, yerna wid ara d-saḥen, d wid isersen ikaramen-nsen deg 2013 yellan deg lejrida». Tameddit n wass n lexmis, imdanen-a yeqqimen i laẓ, kecmen γer yixxamen-nsen.
M. S.