Seg wass n 15 ar 18 unbir, ad temmag ṛṛeḥba tis tesεa n udlis d ugtalɣu amaziɣ deg uxxam n yidles Ali Zamoum n temdint n Tubiret. Ṛṛeḥba-yagi i d-yessudus yal aseggas di temdint n Tubiret Usqamu Unnig n Timmuzɣ, tettili-d d tagnit anda i ttemlilen yimyura d yimaẓragen akked yimeɣriyen n udlis amaziɣ. I useggas-a, amaynut ara yilin ɣef wakken i d-xebbṛen yimḍebren n Usqamu Unnig n Timmuzɣa, ad yili ufsar n yidlisen imaynuten n tsekla i d-yeffɣen deg « teklensit Idlisen-nneɣ » ; rnu ɣur-s idlisen ideg d-jemɛen isaragen i d-yettunefken deg temliliyin tussnanin i yexdem HCA deg useggas 2013 d 2014. Am wakken daɣen ara d-yili ufsar n yidlisen ussnanen ama n tesnilest neɣ n tesnalest tamaziɣt i d-yessufeɣ l’ HCA s lemεawna akked l’ OPU akked l’ONDA. Seg wayen daɣen yettwaregmen ad yili ilmend n ṛṛeḥba-ya tis tesεa, timlilit ara d-yawin ɣef ddublaj n yisura s tmaziɣt. Ad d-yili daɣen umeslay ɣef usaru amaynut i d-yessufeɣ Belkacem Hadjadj ɣef tmeṭṭut yellan d azamul n tegrawla d tlelli Lalla Faḍma n Sumer. Di ttiεad-a ara yekken ṛebεa n wussan, aṭas n umaynut ara yilin, imi sennig n yidlisen ara d-yefser Usqamu Unnig n Timmuzɣa, ad alin daɣen wid i d-yeffɣen ɣer teẓrigin-nniḍen ara d-yettwanecden ɣef demma, rnu daɣen d tagnit akken ad mlilen yimeɣriyen akked yimyura ideg ara ilin wid ara ibudden idlisen-nsen i yimeɣriyen. I zzyada n ttfaṣil ɣef ṛṛeḥba tis tesεa n udlis amaziɣ, tzemrem ad twalim asebter-a n lwab : HCA – 9ème Salon du Livre et du multimédia Amazigh – Bouira
Mokrane Chikhi