Mi tekres , ttaḍnan iduḍan deg fettuy. Ulac tiyersi i iṣeɛben i tulya am tiyersi yurzen yixef. Ulac lehlak i iweɛran am ticki d “wayeḍ” deg ubdil n yiman-is. Lermi yettuɣal-as d aɛdaw, isem-is yezuɣur-it am yir aɛlaw. Timadit n umdan tesbedd rkiza-s ɣef “Nek” n yiman-is akked “ Nek’’ n tmeti-s tin deg i d-yefruri. Mi yenqedwa wa, yegla s wa. Iɣisi yellan yettak lemqud i yiɣisan. Tiɣersi i d-yenulfan tesawel i tɣersiwin ad d-yenulfun. Tajbirt d akellax, aslaɣ d asmerqaɛ. Lmenɛa, netta, yettban d awezɣi.
Anṣib n wumdan yesruḥen lǧera n yiman-is: d lxiq akked ubqenaḍ. Xas nnig tmurt i teddu , ixef-is yekcem di tzuliɣin n wammus. “ Nek” ines yeblaɛ deg uzabuq n yilem. Afeggag ɣef wacu iẓeṭ tudert-is, xerben wulman-is. D tarigla n tizelgi i yesustuyen lɣerza-s. Deg allen n wallen-is, ala tugdi akked lweḥc i yesebraqen. Yedubbez lebɣi deg ul-is. Wejir yurza asirem-is.
Anwi i d netta? D acu-t netta? Ansi i d-yekka ? S anda i teddu ( ma tidet yedda) ? D tuttriwin ixebcen di lmux-is . Xas akken yesteqsa, lejweb (xas ma yella) i tecceg ɣef yiles-is. Yezzi s weɛrur i tidet yellan. Ibeddel taglimt s waglim, xas deg ul-is yeẓra ayen iqedren isɣaren d-agelzim. Ccefra d leqdiɛ n ssif. Zebṛa d tablat n lḥif. Afḍis d tiyita uɣilif. Awdec ma iḥur, ayen i tt –iḥuren d lemhiba n bessif. Ur nuffi lḥebs iweɛran am lqefs deg waḥlen wallaɣen !
Akka i tedra d wid yettraǧǧun anṣib deg alluḍ. Teḥfa tidmi. Nefqen-d ayen ur d- n-ttewwa. D awram n yir iɣsan wuɣur iɣ-id sawlen. Yella di tmucuha: “ffked awarum, ak rruɣ s rrum”. Tisedṣa ma ɣer Ɛica m yiɣden i tella , imeṭṭi ɣer Mḥend bu tkerciwt yugar . Nesla asmi id mlalen. Nejmaɛen , harden, nnan. Ayen ɣef acu nejmaɛen allaɣ ur t-yegzi. Ayen id nnan lbal-nneɣ ur t-yefri. Deg senqud n tqanuẓin , ala d imeweɣrad iḍ yefrurin. Arukti akken ad yalli ur d qqim deg aɛrak, tella-tt deg iɣes !
Aniwel ma tameɣra, tameɣra ur as neḥdir-ara. Aseɣret ma d neqma, neqma ur as-mezmir ara. Zwin yifaden n widen yenwan. Rkan ifurkawen n usaklu n laman. Amaynut mi id yeflali, nuffa-t ziɣ yif-it watlef n yiḍeli. Anda ara tereḍ ay arwiḥ , kečč id sersen ass-a ɣer triḥ?
Imɣaren izemniyen kecmen lhejna n tiderwect. Wa yesfilit wa iqemeḍ deg ul tafat. Nutni myezdin nekni nefraq. Nutni freqen-nneɣ nekni nezdi-ten. Tibernint ma temlleli, tuffa ssebba d tleqa, tettu dnub n uffus ijebden ṭalqa. Telha tuzma ɣef allal, diri-tt ceḥna ɣef win yesqedcen allal. Yenna-tt umedyaz: “nekni mačči am madden!”. Asmi akken I n- teddu, abrid yeččeḥ mi t-nelḥa. Asmi akken nebrek neqqim, abrid yewhem mi iten nugi. Tesleb tiselbi si tselbi-nneɣ. Anda ara tereḍ ay arwiḥ, kečč id wwin ɣer ṭriḥ?
Hum u ɣum, rebbi aɛziz lebṣel qareḥ. Reffu d gma-s n deɛwessu. Muggad uẓemẓum uḥḍim. Mačči d yiwen neɣ ssin n yifeṭiwjen i t-yeggunin. Xerṣum akka id qqaren wid yettraǧǧun ad yekkes ɣef lbir lɣem. Yella deg awal : “ a Briruc, ayen ik-yesebzgen aɣ-irruc”.Ɣef yiffer n leḥlu tuddem tiqit n sser, meɛna zik-nni. Iɛalaq-d uberwaq iles-is amzun akken yeddez yimmi-s. Awal mi yuɣal d-askarkar, abeḥnuq n ṣṣwab akin yekerkar. Am ubeluḍ yeffer ucakar, ur iban d ibiw neɣ d leqhar. Anda ara tegreḍ ay arwiḥ, kečč iɛalqen ɣer ṭriḥ?
Jerri-tt neɣ anef-as kif kif ! Lmisa tebna ɣef lexdaɛ. “ Nekk “ ur neqqim d “ nnek” yedda d iḍuman. Iɣecta n nḥas zwin-t akkin berra n yixef-is. Abudu n temqas yuɣal d axxam-is. Awin i rrun a win yeḍsan kif-kif, xas lhem yezdi tizuraz-is. D awal newcem ɣer twenza asmi akken nella, iɣ-yerran gar lqum d teḍsa. Zik niɣil d umu dzent tfenza i yettun tikli amek tega , ma tura iban: d lebɣi umu yeɛraq lewhi. Mi yenza yisem, ixef yetteǧǧwed leɛdem. Ulac anda ara tegred ay arwiḥ, kečč yeddan mebɣir lebɣi ɣer triḥ!
Ait Slimane Hamid.