Deqs n temnaḍin d lwilayat yemgaraden n tmurt n Lzzayer i yedren tignatin yuεren di ddurt-agi yezrin, sebba n usemiḍ d uγelluy n tusniwin n lḥamu γer ddaw yilem, dayen id-yeglan s uγelluy n wedfel γef idurar εlayen d tγaltin iεeddan 300 lmitrat, ger-asen lwilaya n Tizi-Wezzu i iḥuza usemiḍ d uγelluy n wedfel s waṭas.
Tamnaḍt n Wizgan d tγiwanin is-yezzin, ger-asent At-Zikki, Illula n umalu akked At-Yeğğar d tid yedren tagnit-agi, anda adfel yessa mačči d kra, yegla-d s wargal n deqs n yibardan icuden ger tudrin, maca tikkelt-agi yemgarad aṭas γef useggas 2012, γas banen-d kra iεewiqen maca , imḍebren n tγiwanin-agi beggsen-d aken iwata lḥal, anda i sxedmen tazmart-nsen, allalen d ttawilat sεan i tuksa n wedfel. ṣawḍen jarden ahil n lεejlan, i ixedmen 24 γef 24 n tsaεtin i tuksa n wedfel deg ibardan imeqranen, am webrid n lwilaya uṭun wis 251 icuden ger Wizgan akked Yiεeẓẓugen, abrid icuden ger tγiwanin d kra n tudrin. Maca adfel-agi ixelqed yiwen n wuggur, imi imawlan n yinelmaden n yeswiren yemgaraden di 04 n tγiwanin tesεa temnaḍt (dayra) n Wizgan, ger-asent ; Wizgan, At-yeğğar, At-zikki d yillulen umalu, uggin ad-sarḥen i waraw-nsen γer yiγerbazen ad γṛen sebba n warggal n waṭas n yibardan icuden ger tudrin-agi d yiγerbazen yemgaraden, rnu tella tegdi γef ugeffur sawayes yezmer ad-yeglu wedfel-agi. Si tama niḍen, deqs n yixeddamen ur yeqsiden-ara imeḍqan uxeddim-nsen sebba n lexṣaṣ di ttawilat n usiweḍ, dayen i yeğğan deqs n tkebbaniyin ttewγelqent. U ger n yibardan imeqranen iregglen ideflawen dagi ti temnaḍt n wizgan, ad-nnaf abrid aγelnaw wis 26 icuden ger Tizi-Wezzu d Bgayet i iεeddan tama n yicellaḍen d Wizgan, abrid n lwilaya wis 251 icuden ger tγiwant n Wizgan d criεa u yessufuγ srid γer yefri uzellagen tawilayat Bgayet, abrid n lwilaya wis 09 icuden ger tγiwant n yillulen umalu d tizi icellaḍen. Ma yella d ibardan niḍen d wid yuεren i uεeddi sebba n wucuḍ yellan. Ma yella d isufar n wučči d wid yellan, acu kkan yella yiwen n wuggur meqren id-muggren imezdaγ n mara tudrin n tγiwant n At-Zikki di ttawilat n usaḥmu.
I. B