Adfel yewten s leqsaḥ deg ugafa n t’murt, yaɛzel aṭaṣ n tuddar n tama n lɛarc n’At Ɛebbas. Imeččimen n wedfel yewḍen ɣer kra n 10 isantimitren deg tama-agi, yegzem akk iberdan yettawin ɣer tuddar n t’ɣiwanin n Iɣil Ɛli lakked Buǧlil. Tuddar-agi zgant-d deg yidurar yulin nnig n 600 lmitrat ɣef lebḥar, ɣef ayagi yessa wedfel dinna s waṭaṣ. Seg wass-nni n Larbɛa, abrid aɣelnaw wis 106, yettɛedayen ɣef t’ɣiwant n Iɣil Ɛli yegzem seg taddart n Aẓru alarmi d Buni, s wazal n 25 ikilumiṭren. Imḍebren n t’ɣiwant-agi yenṭarren aṭaṣ, ttruẓun asalu s walallen ilaqen, akken ad ldin abrid-agi akk d yibardan yettawin ɣer tuddar nniḍen. Ar ass-a, iberdan yettawin ɣer kra n tuddar deg t’ɣiwant n Iɣil Ɛli, mazal ɣelqen am El Qelɛa, At Sraǧ, Taẓla, Tabuɛnant akk d ttiyaḍ. Imezdaɣ kkaten ad rzen asalu sɣursen akken ad fɣen. Ma yella deg t’ɣiwant n Bujlil, llan-t krad n tuddar yenṭaren deg tiyita n wedfel-agi. Tigrin, Ḥamda akk At Wihdan abrid yettawin ɣer din yeɣleq, akka tura imi n ttaru izarigen-agi. D-acu kan, ɛla ḥsab yiwen yiles n t’ɣiwant-agi n Bujlil, iberdan « yettuneṭlen » sedaw wedfel ur ttɛeṭilen ara ad ldin. D-acu kan, tiyita-agi n wedfel t-begen-d belli tuddar n snat t’ɣiwanin-agi ur zmiren-t ara ad qablen-t ideflawen, acku ur sɛin-t ara allalen ! Asaḥmu, asewwi lakked d-uṣiweḍ ttuɣalen d-iɣublan imuqranen deg tuddar-agi. Aḥun a rebbi, tiyita n wedfel-agi ur ed ussi ara deg tallit n leqraya, wamma iselmaden d yinelmaden ur ttruḥun ara ɣer iɣerbazen nsen ! Aɣbel nniḍen icud tikelt-a ɣer tiqarɛatin n lgaz. Ussan-agi n wedfel yegred, deg tama-agi n’At Ɛebbas, cceda ɣef lgaz, imi medden ttqelliben ɣef tiqarɛatin n lgaz, yiwḍen ɣer 300 idinaren. Aṭaṣ n yimezdaɣ n tuddar ssaxdamen isɣaren akken ad sewwen neɣ ad saḥmun, imi lgaz ixuṣ dayen kan. Ayagi yerra-d ɣer wallaɣ n yimezdaɣ n lɛarc n’At Ɛebbas asutar n lgaz « de γille », i ɛeṭlen iseggasen-agi ineggura ur yettwaxdem ara.
Syphax.Y