Di cetwa, mi tezdi lehwa, neɣ isenna-tt udeffel, ulac d acu yifen iɣimi tama n lkanun, anda tṛeqq tqejmurt, akken ad qden-t tjujar. Di tallit-agi, asemmiḍ iseɣlay-ed axlul, isdubbuz iḍudan, tifednin ma dagella aman ufan-d abrid ɣer werkas. Imezzuɣen ma yella ur yuɣal ara fell-asen uqelmun ad uɣalen d izeggaɣen am ṭumaṭic. Leḥnak, ula d nutni, ur ten-yezgil wara. Di tallit-agi n tegrest, ulac d acu yecban aseḥmu ɣer lkanun. Lḥamu d-yettekken seg-s tettɛedday aglim, tettawaḍ ɣer yiɣes. Lkanun iseḥmuy tafekka lak d wulawen. D amekkan d-isejmaɛen yak iɛeggalen n twacult and isqerdicen iɣeblan-nsen, ayen ten-iceɣben, d wayen temsal nniḍen icudden ɣer tudert-nsen n yal ass. Taqejmurt tettruɣ deg lkanun, irrij iceɛɛel deg-s. Iɛeggalen s d-yezzin am umeqyas, leḥnak zerɛen-ten idammen. Allen berqen-t-ed sebba n dexxan, maca imɣaren qaren-d d akken d ayen isen-t-yelhan acku d tagnitt akken ad d-iriden-t. Lehwa tsers ixef-is di berra, abruru alama s tenniḍ ad d-yeflu sqef. Maca ulac tugdi, acku imdanen yak heggan-d ttawilat ilaqen akken ur ten-yettxaṣṣa wacemma. Ikufan čuren d tuččit, ayen ara ten-isefɣen alam d tafsewt m ijeǧǧigen. Aheggi ibeddu di tagara n unebdu. Deg tama n lḥara ttrusen-t tqejmurin lak d tqucḍin n yesɣaren d tid n wezzu akken ur ten-id-ittqerrib ara usemmiḍ. Mi yekfa imensi, ad d-yaweḍ lawan n tmucuha, timseɛaq lak d temseḍsay. Tagnitt itteksen ɣef wulawen. Taḍsa d unnecreḥ uqbel ad refden iman-nsen akken ad sersen amezzuɣ ɣef tsumta. Iberra ageffur yettseryix d leḥmali, lqermud yettarra-d ṣewt-is. Ayen d-yesrusuyen iḍes deg tkanna mbaɛid ɣef uqedduḥ n yirrij.
Fatiha K.