I lmend n useggas wis 26 seg wass mi yemmut Dda Lmulud At Mɛemmer, ad d-nezzi am yal tikelt i wakken ad neḥyu awal-is, tamusni-s d ubrid i ɣ-d-yenǧer.
Ass-a, ilaq ad t-id-nessukes si tatut yecban lmut; am akken ɣ-d-yessukes si tillas (ṭṭlam) n umezruy. Acku d tatut i ineqqen igduden. Win yettun amezry-is, tutlayt-is, idles-is d wakal-is,….. acu ara s-d-yeqqimen? S wacu ara yesɛu isem gar yegduden nniḍen n dunit ? I tmudi n tudert-is, Dda Lmulud yufrar-ed gar imusnawen imeqranen. Yerra-aɣ-d ccan d wazal, s wayen yura d wayen yenna.
Si tmurt n Leqbayel ar Icelḥiyen, seg Waṭlas ar Lgurara, seg wedrar ar Tniri, seg Umalu ar Usammar,…Tamurt imaziɣen yekka-tt-id i wakken ad yesdukel tagamat d yidles amaziɣ. Ur t-yecqi acu ara t-id-iṣaḥen, ur t-yecqi ad yeṭṭef kra n wemkan di leḥkem, ad yali d aneɣlaf neɣ bitta d lwali. D tutlayt d yidles n Tmazɣa i t-yrḥan, i ɣef yefka ddunit-is meṛṛa. Xas ayen yuklal ur s-yuɣal ara s wudem unṣib, maca wid-is, igduden imaziɣen anda ma llan ttqadaren-t, ttɛuzzun-t, ttgalan-yes, smektayen-t-id am nekni ass-a.Ass-a, ayen ara yessidren Dda Lmulud, bab n tmusni d wawal yesɛan azal, d idlisen-is ma neɣra-ten, d tamaziɣt ma nettaru yes deg yiɣerbazen, deg yidlisen, deg yiɣmisen d lbiruwat. Acku, agdud ur nesɛi ara iles d yidles, am ṭejra nebla iẓuran. Cwiṭ kan n waḍu ma ihubb-ed ad tt-yeqleɛ. Akken ur rekkun ara iẓuran-nneɣ, ilaq ad ten-nesway s usefti d usnerni n tutlayt d yidles nneɣ.
“Afus deg ufus, Taɛkemt ad tifsus”
Agraw n inelmaden
Tasnawit si Lḥasen Utaleb n At-Yanni