Deffir n tedyant-nni n Uweqqas i d-yeɣlan s sa (7) n yimattanen ɣef sebba n yiwen n usyax n udrar n Uweqqas, ḍran-d taggara-ya isyaxen deg waṭas n temnaḍin n unẓul-asamar n Bgayet, yettusemma seg Suq Letnin semmed akkin. Maca tikkelt-a, iheggen kan Yuc, ur d-llint terwiḥin i iruḥent d tiseflatin deg wayen i d-yeḍran. Gar yisyaxen-a ihi, yella winna n Ayt ɛnan i d-yellan ugar n ddurt ɣer deffir. Kra n yidɣaɣen, ur mecṭuḥit, sadden-d seg ufella n udrar almi rran tikli tewɛer i kra n wakud. Asyax nniḍen yeḍra-d deg tɣiwant n tsexriwt, deg ubrid yettawin ɣer taddart n Ayt ɛli ed Mḥend. Adrar-nni dɣa segmi i d-tecfa tsuta n yiḍelli netta yettseyyix, maca deg tegrest n useggas n 2011, iban-d belli yella umihi (danger) d ageɛmir ɣef yimezdaɣ n temnaḍt-nni, imi dɣa aṭas seg-sen i iwumi ceqqen yixxamen almi ttuḥettmen ad ǧǧen tinezduɣin-nsen imir-nni. Yuɣ lḥal, werɛad i asen-d-fkan yinesdabuyen (autorités) tinezduɣin timaynutin, ɣas ma heggant yakan deg Lberǧ n Mira. ḥeḍren daɣen yiɣermanen (citoyens) n unẓul-asamer n Bgayet ɣer uɣilif wayeḍ n yiberdan. Wa yerza abrid n twilayt i iteqqnen taɣiwant n Ayt Smaɛel i tin n Tsexriwt. D akal i yelḥan, am lberṭa, almi yeǧǧa abrid-nni yemmerwal ɣef yiman-is, yeččur akk d iceqqiqen, ed yimedwan imeqqran. Tazwara, yella ulac win izemren ad iɛeddi fell-as, maca imḍebbren n tɣiwant uzzlen ssan-as kra n ubiṭan bac ad iqeɛɛed ulama cwiṭ. Syin dɣa, wid iqeddcen deg tumnayt tazayzant (transport public) uɣalen ur ttkimmilen ɣer wadda, tteḥbasen kan anda izuq ubrid, wiyaḍ ttawin-d seg wadda ɣer wadeg-nni daɣen dayen. Sebba mi ileḥḥu akka wakal, ur telli mi llan waman deg temnaḍt-a. Maca anect-a icudd ɣer tezmert (l’état de santé) n twennaḍt-nneɣ. Imi dɣa, mi ttruɣunt tẓegwa-nneɣ yal anebdu, ur tesɛiḍ anwa i izemren nniḍen ad ak-yeṭṭef akal; ma mačči d ṭṭjur. War ma nettu, dakken ahat ula d tiregwa akked yiḍerfan xussen cwiṭ deg yidurar-nneɣ, mačči am zik. « Ilaq ad nuɣal ad nerr awellih ɣer ugama-nneɣ: ad neẓẓut ṭṭjur, ad nɛus akken ur ttruɣent deg unebdu, maca daɣen, ilaq ad nxeddem iḍerfan am yijudda-nneɣ ». Akka i aɣ-d-yenna Arezqi.
Mhenni Xalifi