Akken ḥsan kra wid yeṭṭafaren taluft n tmaziɣt deg tmurt, yella-d taggara-ya ttiɛad gar Usqamu Unnig n Timmuzɣa akked tneɣlaft n usegmi massa Benɣebrit. D timlilit ideg i d-yella yiwen n umtawa deg teɣzi n wakud, akken taɣlift n usegmi ad d-telhu ugar ed tutlayt tamaziɣt sey-a ɣer sdat. Dɣa yenna-d ɣef waya umaray amatu n usqamu, mass ɛessad i umaṭṭaf aɣelnaw: «Timlilit-a anamek-is dakken adabu yenwa d tidet ad yefk azal i tmaziɣt, iwakken sey-a ɣer sdat, akk uguren i d-nettmaggar deg usnerni n tmaziɣt ad kksen. Acku ar tura, akken teẓram, tamaziɣt ḥaca tettwasselmad deg 11 n waɣiren, aya ur yelli d iswi-nneɣ. Nebɣa ad as-nefk i tmaziɣt udem aɣelnaw, ad tili deg 48 n waɣiren i tesɛa tmurt. Rnu tamsalt n tmaziɣt ur teɛna ara kan Asqamu Unnig n Timmuzɣa.» Ad d-nesmekti dakken deg temlilit-nni n 21 furar, yefka-d usqamu unnig n timmuzɣa 8 n yisdawanen, terna-d teɣlift 7 s ɣur-s almi tettwasbedd yiwet n tesqamut ara igen kra n yinadiyen ɣef waddad n tmaziɣt, acku iswi amiran n wid ileḥḥun i ubaɣur n tutlayt-is, d assiweḍ n tmaziɣt ɣer 24 n twilayin sey-a ɣer 2 n yiseggasen. Seg tama-s, ula d taɣlift n yidles tesbeyyen-d zun lebɣi n uwanek bac ad yerfed tutlayt n Dda Lmulud ugar, dɣa tenna-d i umaṭṭaf aɣelnaw dima: «Ilmend n wass agreɣlan n tutlayt tayemmat, nenwa ass-a ad nestenyi yiwen n umtawa akked usqamu unnig n timmuzɣa i usnerni n tmaziɣt, d ayen iɣef nemsifham 6 n wayyuren tura ɣer deffir. Rnu, skud nusa-d ɣer da akken ad nestenyi deg uxxam n usqamu, aya d ccɣel n lɛali. Anect-a iwakken tutlayt tamaziɣt ad tesɛu amkan-is i ilaqen deg uɣlif n usegmi. Maca, ayen ara inefɛen ugar nnig n waya d aqeddic. Ilaq ad yili uqeddic n uslugen, ed unadi ɣef waṭas n tlufa (…). Amtawa-ya d ayen ara yessisehlen iqeddicen-a ɣef tmaziɣt.» Aṭas i yettraǧun aredmani ad yili ugmuḍ n wayen i d-iḍerrun deg wannar, deg wakud ulḥim.
Mhenni Xalifi