Taluft-a d tin i d-ijebden awellih deg tallit-a i d-yeggran. Ma yella zik mara d-nini adrar anamek-is tizzegzewt, tibeḥyar, littaɛ, abeḥri yezdigen, tasusmi akked ugama, ass-a iteddu waya srid akken ad ibeddel s tidet, almi uɣalen kra n medden ttmesteqsayen s usnuzgem ɣef wanida akka teddun yidurar ed wid i ten-izedɣen. Segmi i d-iga uwanek n Lezzayer deg yiseggasen iɛeddan ahil n tallelt i ubnaw n yidurar, mu ssawalen yizwawen « ixxamen n lḥukuma », bdan yidurar ssenfalen udem ttuɣalen d ayen nniḍen, neɣ ad d-nini ttakken anzi ɣer waɣir, ɣer temdint. Ass-a kra n win yellan yesɛa taferka, d tulḥimt neɣ teggug (teqreb neɣ tebɛed), yerra-tt yakan neɣ yettheyyi ad tt-yerr d adeg i tnezduɣt-is tamaynut, almi dɣa ur d-mazal tibeḥyar sdat n yixxamen am zik, ur mazal ireẓwan yettwaẓẓawen ala deg tecwawin n yidurar maḍi maḍi. Ass-a, simmal teṭṭuqut tazzla n yilemẓiyen ɣer lebni n yixxamen, simmal tteḥcirent tuddar iteffer wakal yettmagga d ssiman. Aya iban ansi i d-yekka, seg gemmu n yimezdaɣ n tudrin i yettziden seg useggas ɣer wayeḍ, imi ma yella deg temdint ssalayen d asawen, deg udrar atnan tazwara ttarran tiferkiwin d ixxamen. Maca daɣen tella tmentilt (sebba) nniḍen, i ineṭḍen ɣer uɣilif inmetti i d-snulfan medden. Amek aya? Iseggasen-a ineggura nwala tneffu lɛada-nni i llan sɛan yizwawen zik; tinna n tdukkli, n tudert lwaḥi deg ukeddus, meḥsub deg tmezdit. Tura, yal mara d-yemɣur yilemẓi ibennu axxam i yiman-is send ulama ad yercel, aniɛad ihi ma yewwi-d taqcict-nni i ara as-ibedlen tamuɣli ɣef yimawlan-is. Ad ten-yettwali d iwerdanen, ad irewwel fell-as. « Akken i d-yettili ddiq deg ugama i d-yettili deg wulawen. Ass-a deg ussan, ula d lexrif ur t-tettafeḍ deg lawan-is ḥaca deg tẓegwa ». I aɣ-d-yenna yiwen n umsedrar. Seg wannect-a merra, skud yewɛer akken ad tettwaɛiwed tmuɣli, ala ayen ara d-yernun iɣeblan i tmetti tabudrart s umata i izemren ad yili.
Mhenni Xalifi.