Amur ameqran n twaγiyin, deg useggas n 2014, ḍrant-d deg ubrid aγelnaw (114), syin abrid aγiwan (93). Ma γef yimejraḥ inehren ad naf : 140 n yirgazen, 06 n tlawin. Ma γef wid ixeddmen tiwaγiyin s waṭas ad naf wid-nni yebdan tanhert gar 2 n yiseggasen n 5. (137 n twaγiyin). Massa Djamila Temmar d nettat i d timḍebber n taywalt (communication deg Tizi Uzzu). Nemlal-itt deg tmesikent i xedmen iγallen n laman γef uwelleh d useḥbiber γer twaγiyin n yiberdan deg uxxam n yidles Mulud Mεemmri ass-nni n 6 deg maggu-agi iεeddan. Nesteqsa-tt γef yiswiyen n leqdic-a akked wamek i d-yettili deg unnar.
D acu i d iswi n leqdic am wa ?
Massa Djamila Temmar : leqdic-a yella-d i lmend n wass n usikel (circulation) deg yiberdan. D leqdic i nxeddem yal aseggas. Ussan-a (6 d 7 deg maggu), nhegga-d deg-sen isellan d tmeskiniyin γef tγellist (sécurité) deg yiberdan. Nesken-d ttawilat n useḥbiber d uwelleh i nesseqdac deg unnar akked yigemmaḍ n twaγiyin. Am wakken i d-yella usegmi γef usikel n yiberdan i yinelmaden n yiγerbazen n lwilaya n Tizi Uzzu. Akka tura, dγa, ha-ten-in deg uγerbaz amenzu Dali la sγarayen inelmaden γef usikel n yiberdan.
Yerna ahil-nneγ yettawi-d γef useggas kamel.
Aya, yewwi-d lfayda-s ?
Yewwi-d lfayda, mebla ccekk. Meεna mazal tiwaγiyin daymi i nettruḥu γer berra, nettemlili d wid inehren i wakken ad ḥassen mliḥ s uqader n lqanun n tenhert. Aya, yettili-d deg taggara n ddur, ladγa deg wass n ssebt imi imdanen sgunfuyen. Leqdic am wa, igerrez nezzeh imi i d-yettawi lγella-s.
D acu d sebba n twaγiyin ?
Sebba tamezwarut, tban, d amdan. Yir tanhert, meḥsub iḥerres yerna ur yettqadar ara angal (code) n ubrid. Tis snat d liḥala n ubrid, aṭas deg-sen i yesεan iεewwiqen. Tis tlata d liḥala d dir n tkerrust mebla ma nettu, di&gamma,; tissit…
I gar n tenhert n urgaz d tmeṭṭut ?
ulac lfiraq xas ulamma nezmer ad d-nini d tameṭṭut i yettḥadaren akka ciṭ…
D acu n ttbut i tzemreḍ ad d-tefkem γef wakken leqdic-nwen yewwi-d lfayda-s ?
Neqsent twaγiyin n yiberdan s 29 % deg lwilaya n Tizi Uzzu deg tazwara-agi n 2015.
I wakken ad aken-fehmen yimdanen, akken teẓriḍ, ttawil amezwaru deg taywalt d tameslayt. Deg tmesikent-agi-nwen, turam-d s taεrabt akked tefransist meεna ulac tamaziγt, i wacuγer ?
Massa Djamila Temmar : d ṣṣaḥ, ilaq… Yerna aql-i la heddreγ s tqbaylit !
Yesteqsa-tt Hocine.M