Deg wayyuren-a imenzwura n useggas n 2015, ilemẓiyen n tɣiwant n Ayt Smaɛel (60 n yikilumiṭren ɣer usamar-anẓul n Bgayet) atenan kkren ɣer tigawin n yimussuyen isdukklanen, mi d-snulfan snat n tdukkliwin ta deffir ta i ara iqedcen i ubaɣur (lfayda) n wid yenḥafen, ixussen, neɣ yenṭerren deg tudert n yal ass. Tamezwarut isem-is « Tafat n Lɛali » i d-yennulfan deg taddart n Ayt Tɛisiwt, ttesriḥ-ines tewwi-t-id s wudem unsib ass n 29 seg wayyur-a n yebrir yezrin. Akken i d-yettban dɣa, ddeqs n yiswan i uɣur terra ddhen tessaram ad ten-tessemres deg wannar. Dɣa, gar waqqayen imenza n yiswan-nni, ad d-naf tallelt n yiẓawaliyen, n yimuḍan, axdam n ttawil s tedrimt ladɣa i kra win yuḍnen yewwi-d ad icerreg, akked uheggi n kra n ttiɛadat n lxir. Deg wawal n yiwen n yilemẓi seg yiɛeggalen-is mass Rafiq Sadu yenna-aɣ-d: « Ayen i aɣ-yesbeɣses akken ad d-nesnulfu tidukkla-ya d kra n tektiwin i nwala deg wannar. Ɣef waya, ad d-iniɣ i yilemẓiyen ad zdin iɣallen i tdukkli. Acku llan yiẓawaliyen, llan yimuḍan sran i kra seg tama-nneɣ ». Awal-a iban ad iruḥ srid ɣer yilemẓiyen i ilaq ad ilin d imeltaɣen deg tidukkla-ya tameẓyant imi ar tura ala 13 n yiɛeggalen i tesɛa, gar-asen 7 deg ubiru n tigawt yakan. Tin nniḍen d Tidukkla n Yimeɛḍar ed Yimuḍan Idumen mu yettunefk isem « Tiɣri ». Ar tura werɛad i as-d-yettunefk s wudem unsib ttesriḥ . Ɣef uqerruy-is mass Ɛebdun Smaɛil. Yessaram netta ed terbeɛt-is i iɛeddan 30 ad taweḍ tdukkla-nsen tamaynut ɣer yiswan-is s tigawin yemgerraden deg teɣzi n useggas, imi gar wayen tesres deg wahil icaḍ s ddeqs lemmer ad ilin warmuden seg tikkelt ɣer tayeḍ. Ma nebder-d iswan n tidukkla-ya Tiɣri : yella yibeddi ɣer tama n yimeɛḍar s wayen tla tdukkla d ttawil, asekcem-nsen deg tudert n yal ass, aseḥbiber ɣef yizerfan-nsen s uncad n tamiwin i terza taluft. Tikci n yisafaren i wid yeṭṭfen aṭṭanen idumen, akked waṭas n tigawin i tɛewwel ad teg tdukkla-ya. « Ssarameɣ ilemẓiyen-nneɣ ad d-asen ad d-kecmen deg tidukkla-ya imi tekkat ɣef wayen i d-tessutur telsawit (l’humanisme) ». Akka i aɣ-d-yenna uselway-is mass Ɛebdun Smaɛil.
Mhenni Xalifi