Aṭas n yismektiyen d tejmilin i yuγalen i deqs n yineγmasen n tmurt n lzzayer di temnaḍin yemgaraden ilmend n wass agreγlan n tlelli n tγamsa id-yettuγalen yal ass n 03 maggu di yal seggas. Tamnaḍt n Tizi-Wezzu tella di ttiεad, imi tiddukla n yineγmasen d yemcegεen n Tizi-Wezzu rran tajmilt meqren i yimaγrasen n tγamsa i yettwenγan s ufus n yirebraben, ruḥen d asfel γef tugdut d tlelli n umeslay akken tmurt n Lzzayer ad-yezdi lqed-is, anda id-tella tulya n usebdad n tlelli n tγamsa di tlemast n temdint n Tizi-Wezzu s leḥdur n twacult n tγamsa, imḍebren n yeḥricen yemgaraden, aselway n wesqamu aγarfan n ugarzu n Tizi-wezzu mass Ḥussin Harun,aselway n tγiwant n Tizi-Wezzu mass Ouahab Ait-Menguellet d waṭas niḍen. Dγa tiddukla n yineγmasen d yimcegεen n tγamsa n Tizi-Wezzu, fursen tagnit anda i rran tajmilt i 03 ineγmasen i yefγen tastaγt deg ussan yezrin, wigi d Hamid Makhlouf, Arezqi Hamla d mohammed Chabalah. Akken i tuγal tejmilt meqren i uneγmas n tlelli id-yefkan u mazal yettak-d amaynut i tγamsa s ticert-is qeṭṭiεen γas akken deg ussu i yeẓẓel acḥal wagguren-aya di tmurt n Fransa sebba n waṭan yuεren it-yeṭfen γef teγzi n 06 n yiseggasen-aya, wagi d mass Salem Hammoum, itri yeḍwan taγamsa. Tijmilin-agi yesduritent-id wexxam n yedles n lmulud At-Mεemmar n Tizi-Wezzu s leḥdur n lwali mass Abdelkader Bouazgui anda id-tella tikci n warazen usebγes i neγmasen-agi d twaculin n wid ur-neḥdir-ara, syen llant-d tnigiyin γef umecwar n yineγmasen-agi akken id-yella wesqardec s telqay n yiγeblan i ttidiren ineγmasen di lxedma-nsen n yal ass akked d yemḍebren n tmahliwin yemgaraden. Si tama niḍen tamahla n yedles n ugarzu n Tizi-Wezzu terra tajmilt i 02 n yineγmasen i tewwi tmettant deg seggasen-agi yezrin, wigi d Nadir Bensbaa akk d Abdelkrim Djaad, s leḥdur n twaculin-nsen, imḍebren n lwilaya n Tizi-Wezzu γef qaru-nsen lwali mass Abdelkader Bouazgui, Tidukla n yineγmasen d yemcegεen n tγamsa n Tizi-Wezzu d yinebgawen niḍen, anda yexleḍ lfarḥ d yimeṭṭi, maca d ass i yifen mera ussan imi temlal tasa d way turew.
I. B