Mi ara alin-t tseddaṛin n lḥamu yelha kan i yiwen as-yerwel ɣer yil. Dinna xarṣum ulac tisiqas n lḥamu. Ula d lxater yeggar-ed nnehta. Wa yesɛedda aseggas allen-is ur d-tteksen-t ara deg ittafsaren d yedlisen, kra nniḍen d tazla s axeddim. Tallit n unebdu d tin n westaɛfu n wallaɣ lak d tfekka. Di tmurt nneɣ, anebdu, tineggura-agi, yettekkes-as amkan-is i tefsewt. Werɛad ara tekkaw tmiqqewt taneggarut n lehwa, iṭij ad d-icɛel tiṭ-is. Uqbel anebdu, imdanen ttarran lwelha-nsen ɣer tẓegwa. Din ttwaɛṛaḍen ɣer ubeḥri d tili. Xas akken imḍebren n tmerrit ur ttaken ara azal i wayen tekseb tmurt, maca tineggura-agi imdanen bdan ttarran lwelha-nsen ɣer imekwan yuklalen zyara. Atas n twaculin i yrezzun ɣer tzegwa. Ulac d acu yifen aya, di tagara n ddurt, ladɣa ma ddan yak iɛeggalen n twacult. Tizzegzewt ur s-ibeddel ara udem yiṭij. Imɣan glan-d yak s ujeǧǧig ɣef ayeg ttezzin yeglafen n tzizwa. Ifrax sriffigen ɣef isekla, ma walan-d abelɛuc, neɣ kra yettenbiwilen ɣef lqaɛa ad d-qemɛen fell-as. Di Tizi Wezzu d Iɛekkuren id d-ijebden tamuɣli n yemdanen. ɣef teɣzi n useggas, rezzun-d akken ad ksen lxiq w’ad d-agmen seg tala id d-yezgan nnig n webrid. Tettazalen am yiḍ am zal. Di tefsewt neɣ deg unebdu imdanen ur d-ttafen ara abrid ɣur-es. Adeg-agi yettwassen s cbaha-s lak d tezdeg-is. ɣef teɣzi n webrid, ama ɣef yidis ayfus, neɣ ɣef zelmaḍ, afexxar yetteɛraḍ-ed imesberdan ad d-hebsen. Ibekkan, ula d nutni, zgan tama n webrid, ttqabalen imesberdan s wezmumeg, ayen yettaǧǧan atas n lɣaci ad d-hebsen ɣur-sen akken ad d-etfen ttsawer yidsen. Di tallit n remḍan, tiwaculin, mi rzan-t lmeɣreb rezzun-t-ed ɣer tezgi n Iɛekkuren akken ad sɛeddin-t tameddit deg umkan-agi iselken deg icekkaren n zbel d wafrasen yettnemḍaren deg teɣmert ɣer tayeḍ.
Fatiha K.