I tikkelt tis snat, tasqamut n useḥbiber ɣef JSK thegga-d timlilit-nniḍen deg temdint n Tizi Uzzu ass-nni n 16 deg yulyu-agi iɛeddan.
Aṭas n yimferǧen n JSK i d-yusan tikkelt-a (ugar n 20 000), ṭṭalaben deg uselway-is i wakken ad iruḥ ad yeǧǧ tarbaɛt-agi n ddabex ad tt-seddun wiyaḍ, imi ,dɣa, ɣef wakken i d-nnan, llan wid i yebɣan ad ṭṭfen JSK meɛna cerḍen-d rwaḥ n Hannachi.
Aya, yeǧǧa kra n yimdanen ad cakken deg lecɣal am wigi imi ur d-bdiren ara, s wudem unṣib, isem neɣ ismawen n wigi i yebɣan ad tt-ṭṭfen. ‘’Lukan i d-nnan isem n wagi i yebɣan ad yeṭṭef JSK, tili ad d-yeqqers udrar ass-a’’ i aɣ-d-yenna yiwen gar yimferǧen. Tebda-d tikli seg unnar n umenzu n wunbir ɣef 11h d abrid ɣer lwilaya. Deg ubrid, i yiṭij, ttɣennin yimferǧen tizlatin n Matoub, ladɣa, tizlit ‘’Kksen-aɣ la JSK’’. Simmal tetteddu tikli, simmal yettnerni ugemmuḍ-is. Mi wwḍen ɣer lwilaya, kecmen kra n yiɛeggalen n tesqamut i wakken ad d-ẓren lawali, meɛna ur t-ufin ara. Gar yiɛeggalen d yimyuraren iqdimen i yekkan deg tikli-a, ad naf : Fergani, Iboud, Mennad, Dali, Bahbouh d wiyaḍ. Ass-nni, imdanen akken ma llan heddren kan s teqbaylit. Ur nuɣ ara tannumi s wanect-a deg Tizi.
Deg taggara n tikli, nemlal FERGANI akked IBOUD, nesteqsa-ten ula d nekni s teqbaylit.